كشف الإعلامي مصطفى بكري عن وصول أصداء مباراة منتخب مصر والأرجنتين في دور الـ16 من كأس العالم 2026 إلى أروقة الأمم المتحدة، قائلا: محدش كان يتخيل إن مباراة كرة قدم توصل لأروقة الأمم المتحدة، لكن ده اللي حصل، بعد ما رئيسة الجمعية العامة للأمم المتحدة استشهدت بمباراة مصر والأرجنتين في دور الـ16 من كأس العالم 2026، واللي انتهت بفوز الأرجنتين 3-2، بعد ما منتخبنا كان متقدم بهدفين وسط قرارات جدلية للحكم.
وصول أزمة مباراة مصر والأرجنتين
وتابع مصطفى بكري خلال برنامج حقائق وأسرار على قناة صدى البلد: رئيسة الجمعية العامة قالت إن اللي عمله المنتخب الأرجنتيني درس في الإصرار وعدم الاستسلام، وإن الفريق فضل يحارب لحد آخر دقيقة، واعتبرت إن دي نفس الروح اللي العالم محتاجها علشان يحقق أهداف التنمية المستدامة.
وواصل مصطفى بكري: الرد المصري كان في التو واللحظة، وجاء على لسان وزير التخطيط والتنمية الاقتصادية والتعاون الدولي الدكتور أحمد رستم، اللي أكد إن الإصرار مهم، لكن الإصرار لوحده ما يكفيش، وقال إن أي نجاح، سواء في الرياضة أو في التنمية، لازم يقوم على العدالة وتكافؤ الفرص، لأن من غير قواعد عادلة، المنافسة بتفقد معناها.
واختتم قائلا: الرسالة المصرية لاقت تفاعل كبير، لأنها نقلت النقاش من مجرد نتيجة ماتش، لقضية أكبر بكتير، وهي إن الإرادة وحدها ممكن تديك القوة، لكن العدالة هي اللي بتضمن إن كل طرف يدخل المنافسة وهو عنده نفس الفرصة.
