والله انت رايق ياعفيفي.. في عز التعب والوجع قاعد تنكت وتتدلع..
انا كده .. ياما دقت ع الراس طبول .. بس المرة دي صعبة وغلسة ورخمة.
الباشا اللي طول عمره تاعبني من وانا عيل مراهق .. قال جي النهارده وهو اللي تعبان .. مالك ياعم الحاج ؟ ماكنت زي القرد وكل ماتشوف واحدة حلوة تدق وتعمل لي فيها عبد الحليم حافظ .. ايه اللي صابك وخلاك تخذلني ومبقتش قادر تمشي بيا خطوتين تلاتة إلا ولازم أقف مكاني واتسند على حد .. مش عوايدك.. طول عمرك شايلني وسارح وانا مطاوعك .. فضلت أدادي فيك لحد مابوظت .. دلعتك لما قلت يابس .. جي بعد السنين دي كلها ولسه عايز حد يدلعك.. وعلى رأى الست وعايزنا نرجع زي زمان .. قول للزمان ارجع يازمان.
………….
الدكتور شاف رسم القلب، لقيته بص لي باستغراب شديد وسألني: انت كويس؟
رديت : الحمد لله
قال : حضرتك حتخرج من هنا ع المستشفى حالا .. لازم تعمل قسطرة.
.. قلت له : وليه حالا .. انا مش تعبان للدرجة دي.
فبص لمراتي وعرف انها دكتورة وقال لها : حالا يا مدام.. مفيهاش هزار!!
……….
المضحك بقى لما الدكتور اللي حيعمل لي القسطرة شافني وسأل : فين العيان؟ رديت : أنا أهو .. قام ضاحك وقال : ياعم ما انت زي الفل اهو .. سيب لي نفسك بقي ٢٠ دقيقة.
وفعلا تلت ساعة كان مخلص بس شكله مش مبسوط : خير يادكتور .. حاقوم امشي وارجع البيت ؟
رد : لأ .. حتقعد معانا شوية.
………..
عرفت بعدها ان فيه جلطة شديدة محتاجة عملية قلب مفتوح .. وبقالي ٣ ايام بيجهزوا فيا قبل العملية.
………….
بيقولوا ان شاء الله سهلة .. بس اهم حاجة متتحركش غير للحمام وابعد تماما عن اى انفعال.
الكلام ده كان يوم ماتش الاهلي والزمالك .. وسمعت ابن اختي بيقول لأبني: محدش يقول له ان الزمالك اتغلب.. هو مش ناقص.
الدكتور كان واقف وسمعه وسألني : هو الباشا زملكاوي؟.. قلت له : للأسف أيوه. فبص لابن اختي وقال له : بلغوه عادي .. ده مش خبر صادم أبدا .. ما طول عمر الزمالك بيتغلب م الاهلي.. على رأى عادل إمام ( متعودة دايما ) .. ولا رأيك ايه يا عم العيان ؟
لقيت نفسي رغم الوجع ميت م الضحك .. قال خايفين يقولوا لي الزمالك اتغلب .. تقولشي بقالنا ٢٠ سنة بنغلب واتغلبنا النهارده.. ياعم روووووح!
………….
ادي الحكاية .. انا عارف أنكم قلقانين .. بس انا مطمن وبطمنكم.. راجع لكم راجع لكم ان شاء الله.. ومحدش بيموت ناقص عمر .. وحتلاقوني دايما بهزر وبضحك حتى في عز أزماتي.
بحبكم كلكم .. ودعواتكم اللي مش ممكن استغنى عنها ابدا .. ربنا يحفظكم جميعا من كل شر.. يخليكم ليا ويخليني ليكم.
