الواجهة الرئيسيةفن وثقافة
العثور على قبرها فى ذكرى وفاتها ال38 – ما لا تعرفه عن الفنانة ناهد شريف
- اليوم ذكرى وفاة الفنانة ناهد شريف (1 يناير 1942 ـ 7 أبريل 1981) حكاية قبرها اللى اختفى 38 سنة اسمها الحقيقى سميحة محمد زكي، اتولدت لاسرة ميسورة الحال، لكن فجأة كل الحاجات اتكعبلت من حواليها وبدأت المشاكل تنزل على دماغها واحدة ورا التانية.
- أول القصيدة اتصابت هى واختها بشلل الأطفال، ولما خفت وافتكرت ان الدنيا ضحكت لها من تانى امها ماتت، وبعدها بشوية سنين صغيرين أبوها مات وبقت يتيمة لا حول لها ولا قوة.
- صداقة ناهد شريف، بالفنانة زبيدة ثروت، سهلت لها دخول مجال الفن، وكانت بدايتها مع فيلم “حبيب حياتي”، وكملت من بعده لحد ما بقت واحدة من النجمات.
- اتجوزت ناهد شريف 3 مرات، الأولى من المخرج حسين حلمي المهندس، رغم انه كان أكبر منها بـ 25 سنة، أما المرة التانية فكانت من كمال الشناوي، وفى المرة التالتة شافت المر مع جوزها اللبنانى إدوارد جرجيان، وأبو بنتها الوحيدة باتريسيا. جرجيان كان معروف انه مدمن قمار ولما مكنش بيلاقى فلوس كان بيستغل ان ناهد فى الفترة دى كانت مصابة بالسرطان ويجمع فلوس بحجة أنه محتاجها عشان يعالجها، لحد ما عرفت وبقت مش طايقاه فقررت أنها تلجأ للسفارة المصرية فى لندن عشان تطلق منه .. وقد كان.
- رجعت ناهد شريف مصر، بعد ما بقت على الحديدة، وبعد ما صرفت كل فلوسها على علاجها، ولما لقت أن مفيش حد واقف جنبها اتصلت بطليقها كمال الشناوى اللى قدر يجيب لها قرار بالعلاج على نفقة الدولة بس الوقت كان متأخر فماتت ناهد، وطبعا بنتها الوحيدة كانت عايشة فى لبنان ومش عارف كانت عارفة هى ماتت امتى واتدفنت ازاى ولا لا ..
- المهم ان محدش كان عارف هى مدفونة فين بالظبط، لحد ما مر حوالى 38 سنة على موتها، وكان جمال درويش المهتم بانه يمشى وراء كل ذكرى ومكان يخص نجوم الزمن الجميل كان مرة فى مقابر المجاورين وكان هناك بيسأل على قبر مديحة كامل، فإذا به يتكعبل فى واحد تربى ويقوله “لا والله ما اعرفش فين قبرها بس فى هنا قبر واحدة ممثلة اسمها ناهد” .
- ولما راح الحاج جمال اكتشف ان دى تربتها ولقى ان اللى مكتوب على القبر اسمها الحقيقى “سميحة” ويمكن عشان كده محدش عرف ان اللى مدفونة هنا هى ناهد شريف،
- وافتكر جمال وقتها أن فى ست لبنانية كانت طلبت منه من سنين انه يدور على مقبرة ناهد، والست بدورها لما عرفت اتصلت ببنت ناهد شريف اللى جات مصر فورا عشان تزور قبر امها بعد 38 سنة.
ابنة ناهد شريف 
الراحلة ناهد شريف في لحظة مرح مع ابنتها الوحيدة باتريسيا
26826851 comments17 shares
