- وصفات الفراخ كتيرة ومتنوعة ومن اجملهم هي وصفة الكوردون بلو وده عشان طعم الجبنة اللي جوه الفراخ وكمان صوص الجبنة المميز اللي بيتقدم معاها، شوفي معانا المقادير وابدأي حضريها عشان تعرفي معانا طريقة عمل الكوردون بلو مع الصوص بأسهل الطرق .
مقادير الكوردون بلو
صدور فراخ رفيعة (على حسب عدد افراد اسرتك)
لانشون لحمة او فراخ او رومي مدخن حسب ذوقك
شرايح جبنة شيدر جاهزة الخاصة بالبرجر
ملح وفلفل وزعتر ناشف
دقيق
بيض
بقسماط مطحون
زيت للقلي
المقادير
مقادير الصوص
معلقتين زبدة
معلقتين دقيق
كوب حليب
ملح وفلفل (شطة لو تحبي)
كوب جبنة شيدر مبشورة (برتقالي او اصفر)
طريقة تحضير الكوردون بلو
- اغسلي الفراخ كويس جدا وسيبيها تتصفى للاخر
لو حسيتي الصدور سميكة شوية حطيها بين ورقتين نايلون ودقيها لغاية ما تبقى رفيعة .
- اخفقي البيض مع الملح والفلفل والزعتر كويس
– ادهني الفراخ بطبقة خفيفة اوي من البيض
– حطي شريحة اللانشون وفوقها شريحة الجبنة - لفي الفراخ كويس اربطيها بأعواد الخلة
- اغمسيها في الدقيق
- انفضيها كويس من الدقيق وحطيها في البيض المخفوق
- اتخلصي من البيض الزيادة وحطيها في البقسماط
- حطيها في طبق وسيبيها في الفريزي نص ساعة
- سخني الزيت كويس اوي واقلي الفراخ مباشرة من الفريزر الي الزيت
- حطيه على ورق المطبخ وحضري الصوص
طريقة تحضير الصوص
حضري الصوص قبل ميعاد تقديم الاكل بنص ساعة بس مش اكتر
– حطي الزبدة في الطاسة وسيبيها تدوب
-حطي الدقيق وقلبيهم سوا بسرعة
-زودي الحليب وانتي بتقلبي وحطي الملح والفلفل والشطة
-اول ما يسخن حطي الجبنة المبشورة
استمري في التقليب لغاية ما الجبنة تدوب خالص
قدميه على طول وهو سخن جدا عشان الجبنة ما تنشفش
ممكن تقدميه لوحده والصوص لوحدة واللي عايز يحط الصوص
او حطي الكوردون بلو في الطبق وحطي عليه صوص الجبنة
وممكن تقطعي الكوردون بلو اتنين عشان الجبنة اللي جوة تظهر وتحطي عليه الصوص .
ملحوظة :
يمكن دهن رول ” الكوردن بلو ” بالبيض و اللبن ووضعها فى صينية بالفرن حتى تنضج و تقدم ساخنة .
