كيف تسعف مصاب بذبحة صدرية أو جلطات بشرايين القلب؟

• معلومة طبية طالما كررناها ونكررها كل فترة ليفهما الجميع
  وتوفى بسببها الممثل هيثم أحمد زكى .

-أى مريض بيشتكى من ألم فى المنطقة العليا فى منتصف البطن لازم يعمل رسم قلب مش هيكلفك حاجه ومجانا في المستشفيات الحكومية لحالات الطوارئ
-مهم جدا لإستبعاد وجود قصور أو جلطات بشرايين القلب والمرضي في الغالب بيفتكروها حموضه أو حرقان في المعده و ياخدو كيس فوار راني أو حقنة زانتاك للمعده او امبول مسكن ثم يموت بعدها بدقائق معدودة .
وبالاخص فى الأحوال الاتيه و تبقى جريمة لو ماعملتش رسم قلب :

1.مريض يعانى من مرض السكر (مهما كان سن المريض أو قصر و طول فترة السكر).
2.مريض يعانى من ارتفاع ضغط الدم.
3.مريض يعانى من ارتفاع فى دهون الدم .
4.المرضى كبار السن.
5.المدخنين حتي لو عمره 18 سنه
6.مريض عنده تاريخ مرضى فى العائله لقصور بشرايين القلب او المخ او الاطراف.
7.مريض عنده تاريخ عائلى لموت مفاجئ غير معروف السبب.
8.مريض عنده ألم فى منطقة أعلى البطن مصحوب بعرق غزير أو انخفاض شديد بضغط الدم.

طبيب الطوارئ هيفحصك ويقيم حالتك ومدي الخطوره ويعمل رسم قلب إذا لزم الأمر لإستبعاد وجود أي قصور بشرايين القلب أو جلطه وانت في الطريق خد 4 أقراص إسبرين أطفال إمضغهم و خلي بالك الوقت هنا من ذهب كل ما المريض إتلحق بدري.
تنبيه : مش كل ألم في الصدر يعني جلطه لا ، في أسباب كتير جدا تعمل الألم دا لكن كل ألم في الصدر لازم يحترم جدا و نخاف منه و الوحيد اللي يطمنك هو فحص دكتور ليك وعمل رسم قلب لو رأي الطبيب ذلك.

بمناسبة الفيديو المنتشر للشاب اللى توفي فجأة في الچيم ربنا يرحمه ، هنتكلم عن الناحية الطبية فى الحالة دي و ايه المفروض يتعمل لو أي حد يعمله لو ناوي يبدأ تدريب ف الچيم او رياضة محتاجه مجهود بدني قوي من باب التوعية :

أولا الأسباب اللي ممكن تعمل موت مفاجئ في السن دا

-كذا حاجه لكن لو هنحدد سبب رئيسي لموت الشباب الرياضين و أشهرهم في سن صغير دا هو تضخم عضلة القلب او ما يعرف طبيا بإسم Hypertrophic obstructive cardiomyopathy أو HOCM وبالمناسبه دا اللي المرض اللي كان السبب في وفاة كابتن محمد عبدالوهاب لاعب النادي الاهلي في أرض الملعب.
-في المرض ده بيحصل تضخم لعضله القلب و الحاجز العضلي الفاصل بين البطين الأيمن للقلب و البطين الأيسر اللي بنسميه Interventricular septum وعشان نفهم دا معناه ايه :

– تخيل إن عندنا غرفتين جمب بعض مساحه كل غرفه منهم
4 م × 4 م واسعين وبتخزن فيهم اللي انت عايزه براحتك بس انت قمت جاي علي الجدار الفاصل بين الغرفتين وقمت مزود سمكه ل 2 متر كدا انت عملت ايه ؟ بالظبط قللت من مساحه الغرفتين ولو قمت مزود كمان سمك جدارن الغرفتين الباقيه من الداخل حجم واحد متر داير مايدور كانك بتبني حيط لازقه في حيطه بس من جوه الغرفه كدا بقت المحصله ان مساحه الغرفتين قلت جدا جدا و مبقتش متاحه تخزن فيها غير كميه محدده طبعا .

شرح مبسط للذبحة الصدرية
-القلب عباره عن شقين الشق الأيمن بيستقبل الدم من الجسم و يحصل تنقيته و تحميله بالأكسجين و يبعته للشق الأيسر اللي هيضخه مره تانيه للجسم مفيش مشكله ، في الرياضين بيحصل عندهم تضخم في عضله القلب و والحاجز الفاصل بين شقين القلب دا فالمساحه قلت و بالتالي بقت كمية الدم اللي رايحه للشق الأيمن من القلب قليله و تباعا كميه الدم لمحمل بالاكسجين اللي اهيتسقبلها الشق الأيسر عشان يضخها للجسم هتقل هي كمان وطبعا نقص الدم و الاكسجين دا هياثر علي الأعضاء المهمه زي القلب نفسه و المخ لان الدم و الأكسجين هما الطاقة اللي بيخلوا خلايا المخ و القلب شغالين ميقفوش.

المريض ف الحالة العادية مش بيحس بأي أعراض لكن بمجرد ما بيبدأ التدريب ف الجيم ، القلب بيحتاج دم اكتر و أكسجين اكتر ولأن ال Cardiac output او الدم اللي خارج قليل و مش بيكفي الاحتياج وقت التمرين فبيحصل توقف لعضله القلب و موت مفاجئ .

سؤال هل كل الرياضين هيحصلهم كدا ! ما في ناس كتير رياضين و مشفناش حد منهم حصله كدا ؟!

-مظبوط لان المرض ده ليه عامل وراثي كمان ، يعنى بيكون عندنا ف العائلة سابقة للموت الفجأة ف الشباب ، وعشان كده أي واحد عنده تاريخ مرضى للموت الفجأة فى سن الشباب زى عمه أو والده أو خاله وبيفكر يروح الجيم بننصحه دايما إنه يزور دكتور قلب وأوعية دموية ويعمل رسم قلب و إيكو عشان نستبعد وجود التضخم ف عضلة القلب ونضمن ان ميحصلهوش موت فجأة أثناء التدريب ولو ثبت فعلا إن فيه تضخم لعضلة القلب بيتم التوقف عن الذهاب للجيم مع إعطاء بعض الأدوية اللي بتقلل عدد ضربات القلب وسرعته وبالتالى ندي القلب الوقت الكافي عشان يتملى بالدم وبالتالى نزود الدم اللي القلب هيضخهه للجسم .

🔹كلمتين خاصين للأطباء فقط 🔹
في الحالات دي بندي Non dihydropyridine CCBs زى ال Verapamil او ال beta blockers ، والهدف الأساسي إننا نزود وقت ال Diastole فالقلب يتملى كويس ويضخ دم أكتر .
لكن ممنوع إعطاء هذا المريض ال Dihydropyridine CCBs او ال Nitrates او ال ACE I لأنهم بيعملوا Vasodilatation للأوعية الدموية وبالتالى بتقلل ال Preload وكذلك ممنوع إعطاء ال Diuretics لأنها بتقلل الدم ف ال Circulation بوجه عام وبالتالى بتقلل ال Preload وفى كلتا الحالات نقص ال Preload هيؤدى بوجه عام لنقص ال CO وده مش عايزينه يحصل ف مريض ال HOCM.
نتمنى تكون النصيحة وصلت للجميع وربنا يحفظكم جميعاً .

–صوره توضيحيه لتضخم عضلة القلب بتبين نقص حجم الشق الأيسر من القلب و بالتالي هتقل كميه الدم اللي هتخرج منه .

د. محمد_السباعي