نيللي كريم تكشف حقيقة تعرضها للاعتداء في مهرجان قرطاج

نيللي كريم.. كشفت الفنانة نيللي كريم، عما حدث معها في مهرجان قرطاج، مُشيرة إلى أنه عندما تواصل معها إدارة المهرجان بشأن الحضور لتكريمها، أخبرتهم إنها سوف تحضر لمدة 24 ساعة بسبب انشغالها في التصوير.

نيللي كريم

وقالت نيللي كريم خلال مداخلة هاتفية في برنامج “يحدث في مصر”، مع الإعلامي شريف عامر:” طلع كلام كتير إني جيت وسافرت وفيه كلام اتقال غير صحيح مكنتش ناوية أرد عليه، لما كلموني عشان أجي مهرجان قرطاج وده شرف كبير ليا إني أروح تونس جدا وبحب الشعب التونسي، وآخر مرة في مهرجان قرطاج الماضي كان بيتكرم نجمنا القدير عادل إمام، فكان شرف لي أن يتم تكريمي في هذه الدورة، طلبت منهم إني أجي 24 ساعة فقط عشان ظروف التصوير، قالولي تمام”.

وأشارت نيللي كريم إلى أنها وصلت إلى قرطاج يوم 30 والمهرجان كان يوم 30، وأنها سافرت صباح اليوم 31، مضيفة:” مكنش فيه مؤتمر صحفي ولا حد قالي هنعملك مؤتمر صحفي؛ لإني مش هكمل المهرجان لآخره، اتهمت إني مقولتش كلمة، متعودة إني في أي مهرجان بنروحه مش أنا بس كل الزملاء بتوعي روحت مهرجانات كتير، لما تطلع المسرح، بيسألولك تحب تقول كلمة أو اتفضل قول كلمة، وقبل ما أطلع على المسرح كنت قاعدة مع طارق الشناوي عاوزة أقول كلمة، وأنا قد إيه مبسوطة وعاوزة أشكر مهرجان قرطاج ولسه بحضر الكلام لاقيتهم ندهوا اسمي واستلمت الجائزة وكنت مستنية حد يطلب مني أقول كلمة، ولم يطلب مني أقول كلمة، أنا شخص خجول لو أنا في مهرجان القاهرة وعلى المسرح كنت طلبت وقولت كلمة، أي حد بيكون حابب يتصور معايا من أصغر واحد لأكبر واحد عمري ما بقول لأ، بس لما خرج المهرجان خرجنا كلنا”.

وأوضحت نيللي كريم أن الجمهور عندما التف حولها للتصوير معها، تسبب ذلك في تمزق فستانها، كما أنها تعرضت لهجوماً حاداً من قبل الجمهور، نظراً لعدم وجود أمن، مُضيفة:”كنت لابسة فستان طويل، والناس داست على الفستان وقطعته، ولاقيت ناس بتزقني عشان تتصور معايا، ومكنش فيه أمن. بعد ذلك حدث نوع من الارتباك؛ لأن فستاني اتقطع، ولاقيت حد بيطلع الموبايل عشان يتصور معايا وحد بيزقني من ورا، يعني فيه هرجلة حصلت، خرجت من القاعة عاوزه أركب العربية وأمشي بسرعة على الفندق، أنا رغم ده كله متكلمتش، بس لاقيت فيه هجوم عليا مش عارفة ليه، وبأنهي سبب، كان معايا طارق الشناوي، الناقد الفني القدير، وهو كان في لجنة التحكيم من أوله لآخره”.

وأكدت نيللي كريم على حبها الشديد للشعب التونسي، مُضيفة:” أنا بس عاوزة أحيي الشعب التونسي؛ لإني بحبه ويربطني بيه ناس كتير حبيتهم منهم المخرج القدير شوقي المجري، اشتغلت معاه وطبعا يعني الممثلين التوانسة اللي عندنا في مصر احنا بنعتبرهم مصريين هند صبري ودرة، كلنا اشتغلنا مع بعض وبنحب بعض وعندي معجبين كتير في تونس أنا بحب تونس وبحب الشعب التونسي وبحترم الثقافة التونسية، مهرجان قرطاج شرف ليا إني اكون معزوم هناك واخد جائزة وأتكرم، مش موقف صغير أو شخص ممكن يبوظ حبي للشعب التونسي، وأنا في شغلي كمان طلباتي على قد الشغل ومعنديش أي طلبات”.