هو غلطان .. مكنش حقه يتكلم في اى برنامج.. معندوش خبرة التحدث مع الإعلام.. لكنه في مباراة الاهلي والزمالك كان رائعا وعادلا إلى أبعد حد.
بتكلم طبعا عن الحكم محمد عادل اللي عمل ماتش عمره رغم حساسية المباراة ومفاجآتها المذهلة ، لكنه كان عاقل وحكيم ، ومحدش فينا أهلاوي او زملكاوي مسك عليه غلطة ، ولو ماكانش اتكلم، محدش كان فتح بقه.. ومع ذلك ورغم اعتراض الأهلاوية علي كلامه إلا اني شايف كلامه منطقي جدا وفي منتهى العقل.
هو قال ايه بقى : الماتش سخن جامد والزمالك اتوتر بزيادة وكان لابد من محاولة احتواء الموقف وتحكيم العقل.. فلو طارق حامد مثلا اتعصب عليه او على قراره بإنذاره، مكنش حتما ولابد يبرق له ويهدده بالطرد .. الثبات الانفعالي عند الحكم اهم بكتير من الثبات الانفعالي عند اللعيبة الكبار.. ولو وصل الأمر حتى انه يطبطب على اللاعب المتعصب وهو بيضحك ، مفيهاش اى حاجة ، بالعكس تتحسب له مش عليه.. انما الهيجان اللي حصل بعد تصريحاته ، هيجان غبي وناس بتصطاد في الميه العكرة .. الزمالك رجع للمباراة بهدف مصطفى فتحي وبقى فرق اتنين.. قام ديانج جاب الرابع وبعدها بكام دقيقة بنالتي ضد المثلوثي وبقت خمسة واحد .. هل المثلوثي كان يستحق انذار تاني؟ .. للأمانة لأ.. انا جيت اشوط الكرة، رجلي جات في بطن اللاعب.. مش قاصد خالص ولا فيها تهور ولا شبهة تعمد .. واتحسبت بنالتي وحقكم اخدتوه .. كرة زيزو ضد قفشة اخد فيها إنذار.. يعمل ايه الراجل .. يعمله محضر في القسم ؟!.. بنالتي الزمالك صح مليون في المائة .. والنتيجة ه – ٣ .. الأهلي لعب ماتش هايل وفعلا احترم الخصم بزيادة .. الزمالك كان زي الزفت في الشوط الاول وانهار بشكل مبالغ فيه.. بس فاق في التاني وقدر يسجل ٣ أهداف.. خلاص ماتش وخلص.. وحكم محترم بجد .. عيبه الوحيد انه سمح لنفسه يتكلم لوسيلة إعلامية بتبحث عن اللقطة والغلطة وتعمل من الحبة قبة ، وبعد ما كانت الدنيا كلها بتشيد بالحكم ، جايين النهارده وبيتريقوا عليه ، والاهلي مقدم شكوى ضده لاتحاد الكورة.. غالب خمسة وجي يشتكي.. سبحان الله.. شر البلية ما يضحك!
……….
بعد الماتش لفت نظري تعليقات في منتهى الغباء .. سيبك من قناة الأهلي بعد الماتش والفرح اللي عاملينه.. وسيبك من كلام موسيماني الغبي الشوارعي ان الماتش الجي حيبقى ستة .. وقفت بس عند كلام جمال عبد الحميد نجم الزمالك والمنتخب سابقا .. كلام عبيط وان الاتحاد بيعاقب الزمالك عشان اخد الدوري وان الدولة واقفة ضده وكلام اهبل مالوش اى تلاتين لزمة وعيب يخرج من نجم بحجم جمال عبد الحميد.
والتاني المتحدث الاعلامي لنادي الزمالك عمرو الدرديري.. ان الزمالك غلب الأهلي في الشوط التاني ٣ – ٢ .. ومفيهاش حاجة لما الوصيف يغلب البطل .. كلام عيل مراهق مبلبع كام قرص مخدر قاعد ع قهوة ، مش كلام صحفي محترم مسؤول عن نادي كبير.
………..
عموما مليون تحية للأهلي من وأحد زملكاوي .. حمدت ربنا ان الماتش خلص على كده ، بدل ما كانت حتبقى فضيحة بجلاجل.. كل الزملكاوية حمدوا ربنا ان النتيجة خمسة بس.. ومني بقى للأهلي عشان تعرفوا اني مش متعصب خمسة وخميسة في عين كل اللي شافوكوا ومصلوش ع النبي.. أما الزمالك فأقول له انت فريق كبير اوي.. والكبير يقوم من وقعته بسرعة ، وميخليش اللي يسوى واللي ميسواش يتريقوا عليه.
………
يالا سلام.
