أحمد عفيفي يكتب : أنا شربت شمبانيا في ألمانيا !!

يالا بقى علقولي المشانق وقاطعوني واللي لسه معملش بلوك ، يعمل!

بس استنوا عليا واسمعوا الحكاية جات ازاى .. كنت في المانيا سنة ٩٧ و معايا المذيعة العملاقة أمال فهمي بنعمل سبق صحفي واعلامي مشترك بيني وبينها ، وكنا في بيت زميلة صحفية اسمها سلوى الرافعي وقاعدين نحتفل بنجاحنا مع مجموعة كبيرة من الأصدقاء هناك.. قوم وانا واقف لقيت الجرسون شايل صينية وعليها كاسات وكل واحد ياخد كوباية.. قمت اخدت واحدة باعتبارها عصير لمون او اى عصير فرش عادي .. اخدت اول شفطة ، حسيت إني حارجع.. ايه الطعم الغريب ده .. قلت لسلوى : العصير ده طعمه غريب اوي .. فماتت م الضحك وردت : عصير ايه يافلاح.. دي شمبانيا ، اشرب وانبسط!!
اقسم بالله حطيت الكوباية على التربيزة وانا قرفان واستغربت الناس ازاى بتشربها وبتحبها ومبسوطة!!

…………
مجاش في بالي خالص انها حرام .. لاني بداهة عارف ان الخمرة حرام .. بس على رأى محمد صلاح مع عمرو أديب : نفسي مرحتلهاش!!
………….
وبمناسبة بقى الدنيا اللي قايمة قومة على صلاح ، لقيت فيديو لواحدة بتعلق على الموضوع ده بذكاء وموضوعية شديدة .. لو انت انسان سوي وبني ادم طبيعي وحد سألك: هل ممكن تمارس الشذوذ الجنسي؟ .. هل من الطبيعي انك ترد : لأ ده حرام ، ولا حتشمئز من السؤال لمجرد انك تتخيل نفسك بتعمل كده؟ .. هل ممكن ترد ان لو الشذوذ مش حرام انا ممكن اعمله؟

بالتأكيد لأ .. فشرب الخمر حرام قطعا .. بس رد صلاح منطقي جدا ( مبحبهاش ولا نفسي عمري راحت لها ) .. مش محتاج يرد ويقول : أعوذ بالله.. ده ربنا سبحانه وتعالى حرمها في القرآن.. لأنه يقينا عارف كده ، فمش محتاج يأكد على ده .. والا حط نفسه في مزنق تاني، يعني لو مكنتش حرام كنت شربتها عادي؟.

………..
تعالوا بقى للبهوات اللي عاملين على صلاح حملة شعواء مالهاش اى تلاتين لزمة وعايز اسألهم كام سؤال كده ع الماشي : هو ربنا مش محرم الخمرة على أمة المسلمين؟ .. حتردوا وتقولوا أيوه .. طيب احنا مصرحين بيها ليه في مصر وكان زمان بتتباع بس في البارات ، انما دلوقتي بقت في السوبر ماركت.. حد من اللي عاملين فيها عنتر على صلاح ، يقدر يسأل الحكومة السؤال ده؟
طيب بلاش .. تعالوا نرجع لحكم الإخوان بتوع ربنا وقال الله وقال الرسول .. لما مرسي الله يرحمه مسك الحكم ، منعها ؟ .. لأ .. ده زود عليها الضريبة بس عشان البلد تستفيد اكتر من بيعها!!!

طيب بلاش ديه .. نسأل سؤال تاني : هو مش ربنا حرم الزنا؟ .. طيب خد مراتك حلالك وروح الغردقة او شرم مثلا وعايز غرفة دبل ، مش حتلاقي الموظف بيطلب منك إثبات إن الهانم مراتك؟ .. طيب لو واحدة سائحة او ( سايحة ) متفرقش ، و معاها حبيبها، البويفرند بتاعها او العكس واحد سايح ومعاها صاحبته، حد يقدر يسأله مين ديه ومراتك ولا لأ؟ .. يعني الفندق عارف وموافق وحاطط لهم في الاوبن بوفيه ع العشاء لحم خنزير عشان هما بياكلوه.. فهل حضرتك ياللي عايز تشنق صلاح، تقدر تقول ان الدولة عندنا بتشجع على الفسق والفجور وسايبه السياح يلغوصوا عندنا براحتهم؟!!

…………..
طيب لو صلاح كبرت في دماغه ورد على عمرو أديب بالكلام اللي انا قلته ده ، كان ممكن يتعمل فيه إيه.. لكن لأنه ذكي وواقعي ومنطقي رد الرد الطبيعي.. ( مش بتشرب خمره ليه ؟ .. لأني مبحبهاش )

…………..
طيب عايز أضحكم شوية .. رحت تونس في مهمة صحفية قبل ٢٠١١ .. وعرفت ان الدعارة هناك مرخصة ، زي ما كانت عندنا في الاربعينيات، وسألت عن الأماكن دي فين ( من باب العلم بالشئ والفضول ، مش لحاجة تانية ) فقالوا لي: في حارة الشيخ عبد الله جش ورا جامع القيروان!
خدوا بالكم (حارة الشيخ عبد الله ورا جامع القيروان ) .. ضحكت في نفسي واستغربت من هذا التناقض العجيب ( دعارة وشيخ ومسجد ) .. ولما جم الإخوان هناك بعد الثورة ، سألت واحد صاحبي تونسي كان معايا في الكويت : أكيد طبعا الإخوان لغوا الدعارة وقفلوا أبوابها .. فرد ردا أذهلني : بالعكس دول زودوا أسعارها واهتموا اكثر بضرورة الكشف الدوري على البنات حفاظا على صحة الرجالة!!

………….
عايز اقول ايه .. كل بلد وله نظامه وقوانينه.. وربنا هو اللي بيحاسب في الأخر .. واحد زي صلاح بعد اى ماتش فاز فيه فريقه، كل اللعيبة بيحتفلوا بهذا الفوز بشرب الخمور وهما في أوضة اللبس.. فيبقى كويس اوي ان صلاح مانجرفش معاهم وشرب.. لكنه خد حمامه وصلى ركعتين شكر لله.
مش عايزين تحاكموه وتنفوه خارج البلاد عشان قال ( مبحبهاش ) .. أمال لو قال ايوه بشرب كنتوا عملتوا فيه ايه؟!!

………..
بلاش عبط وهبل وهرتلة.. بصوا لنفسكم ( مش انتوا بس .. كلنا ) .. اقسم بالله لنحط وشنا في الأرض من أفعالنا ونسأل ربنا انه يديم ستره علينا.. بستره بس إحنا عايشين ولسانا عشرين متر .. ولو فضحنا ، وشوشنا كلنا حتبقى في الأرض.

………….
خلص الكلام .. يالا سلام.

اقرأ أيضا للكاتب :

احمد عفيفي يكتب : متعلقوش المشنقة لحكم ( عادل )!!!

احمد عفيفي يكتب : إن كنت ( نازي ) أفكرك !!

احمد عفيفي يتذكر / بابا عبده : بقينا انتيكا .. دقي يامزيكا!

احمد عفيفي يكتب : الواد( قلبه ) بيوجعه.. عايز حد يدلعه!!