لما سمعت نهاد قمصان بتتكلم وركزت في الكلام .. لقيتها بتقصد مبروك عطيه وسحبت منه لقب شيخ ودكتور .. وعرفت انه بينصح بناتنا انهم يلبسوا ( قفة ) وهما نازلين عشان مايندبحوش.. بلاش المحزق والملزء ، عشان حيشوفك واحد ريقه بيجري ، ولو ما اخدش غرضه منك حيدبحك!
………..
انا مصدقتش الكلام بصراحة .. رحت ع اليوتيوب وجبت الفيديو لقيته فعلا قال كده.. بدأ كلامه بالرحمة على نيرة وربنا يصبر اهلك وينتقم من الحيوان اللي عمل فيكي كده.
لحد هنا والكلام عادي .. وفجأة وبدون اى لزمة خرج عن السياق، وقام داخل في حتة تانية خالص لا مجال لذكرها على الإطلاق.. اتكلم عن الحجاب ، ونصح البنات وقال بالحرف الواحد : لو نزلتي يابت من بيتكم والشعر مهفهف ع الخدود والبنطلون محزء ،حيذبحك ابو ريق بيجري و ( بيتنشأ ) على اى واحدة تشجعه انه يهجم عليها .. انزلي يابت وانتي لابسة ( قفة ) والبسي اى حاجة واسعة اوي لحد ماتشتري هدوم محترمة تسترك من فوقك لتحتك.
…………..
ايه ( الحودة ) الغريبة دي وايه علاقة ذبح طالبة الاداب بالحجاب .. هو اللي قتلها وذبحها داعشي مثلا ؟ .. لأ .. رجل دين متشدد ؟ .. لأ … وهل لبس البنت كان خارج عن الأدب واللياقة ؟ لأ … طيب ايه لزوم ربط الحاجتين ببعض ، إلا إذا كنت ياعم مبروك ياعطية بتصطاد في الميه العكرة .. الموضوع باختصار ان واحد كان بيحب واحدة وعايز يتجوزها وهى مش عايزه.. قام قرر انه يذبحها.. لا له دعوة بأنها مش محجبة ولا بتلبس ايه.. فازاى يامبروك ياعطية تخلط الاوراق بطريقة غلط وغبية.. وبعدين تقوم قايل انه بعت لها رسايل ع الموبايل بالتهديد .. وتتعجب: الله .. ده كان فيه بينكم رسايل ومحادثات وحاجات من دي .. كأنها جريمة ان يعرف زميل رقم موبايل زميلة وممكن يتراسلوا.. لأ يابت انتي وهى .. المحروق اللي في ايدك ده عشان بس تتصلي بماما تطمنيها عليكي او ابوكي يتصل بيكي يطمن عليكي .. غير كده مش مسموح.. غير كده حتندبحي من غيلان ووحوش مالية البلد والمجتمع.
……….
مفرقش ابدا مبروك عطيه عن شوية علقوا على الجريمة بكلام عبيط واهبل وغبي .. واحد مثلا بيتكلم عن ( حسن الخاتمة ) وبيبشر المقتولة بالنار عشان ماتت وشعرها سايب و لابسة بنطلون.. ده بدل ما يطلب لها الرحمة والمغفرة من رب العالمين .. كلنا بندعي للي بيموت ، حتى لو كان نبي ، بالرحمة والمغفرة وان يتجاوز الله عن سيئاته.. لكن يوصل بيا العته واكتب زي اللي كتب ، ابقى مجنون ولا اعرف معنى ديني واسلامي.
…………
انا عارف ان المجتمع مليان بمثل هؤلاء.. ولكن انا بقى كشيخ ودكتور في الأزهر( اقصد مبروك عطيه ) امشي على نفس النهج الداعشي الهمجي ، في نفس الوقت اللي اطلع اهاجمهم فيه ، هنا يبقى فيه خلل في منظومة العقل .. فيه عته في شرح الاسباب .. فيه غباء منقطع النظير في إدخال موضوع الحجاب في جريمة طالبة المنصورة.. !!
…………
يا أخي .. ده لو حصل وواحد ذبح عاهرة كانت نايمة معاه لأى سبب كان .. حنرفض الفعلة ونستنكرها وحنطلب من ربنا انه يرحمها ويسامحها .. مش طالبة مجتهدة .. بنوتة صغيرة .. شابة زي الوردة اللي بتفتح.. اذبحها واجيب اجلها لأنها مش عايزة تتجوزني ، مش لأى سبب تاني .. فقط مش عايزاني.. فلازم بتفكيري المريض والغبي اقتلها!
………….
حكاية البنت نيرة من ساعة ماعرفته وشفت صورتها وانا حاسس انها بنتي .. قلبي اتقطع عشانها .. وكل اللي قلته كواحد عاقل وعارف ربنا : الله يرحمها ويسامحها ويغفر لها وتكون الجنة من نصيبها.
