مدحت الديب أدمن جروب مملكة الزملكاوية .. وهو أحد أهم وأبرز جروبات جماهير الزمالك المعبرة بصدق عن مشاعر عشاق القلعة البيضاء .. كتب بوست على صفحة الجروب فى صورة رسالة إلى زيزو .. قال فيها :
اشمعنا إحنا دونا عن خلق الله اللي لما لاعب يعمل موسم كويس بيذل أهلنا بيه عشان يمشي، وأبوه يعمل خمسين مكالمه في اليوم علي القنوات، واشمعنا إحنا اللي لاعيبتنا بتبقي هايجه علي الاحتراف، خصوصاً لو بصيت هتلاقيهم أصلا ماجبوش أتنين أفريقيا مثلاً .
يعني الأهلي لاعيبته واخده ٤ بطولات قاريه في سنه ونص وراحوا كأس عالم مرتين وبرضوا محدش فيهم فتح بوقه، ومسمعناش عن عرض من الدب الكونغولي لأي لاعب فيهم .
شريف بعد ماخد هداف الدوري وأفريقيا مسمعناش الصداع اللي بنسمعه لما لاعب عندنا يجيبله هدفين في ماتشين ورا بعض، وغيرهم وغيرهم لأن في السنين اللي فاتت لاعيبه كتير من الاهلي تألقت وبرضوا محترفوش .
زيزو لا هو عنده موهبه شيكابالا ولا جمال حمزه، ولا هو صغير زي مصطفي محمد مثلاً، ومفيش نادي كبير في أوروبا بيجيب لاعب عنده ٢٧ سنه يعني أعتقد مفيهاش احتراف في أوروبا، يعني الاحتراف بالنسبه للاعيبتنا احتراف في الخليج .
٣٥ مكالمه في اليوم لابوك في كل القنوات وابني عنده وعنده وضحك علي الدقون وتعشموا الناس، بص يا زيزو مهما كنت غالي عندنا عمرك ماهتكون أغلي من الزمالك، يعني مجرد ماتمشي وتروح مكان عبيط والجمهور محتاجك الحب هيتحول ل كره .
أنت نفسك موقفك غامض، يعني ايه مش عارف هتكمل لا لا، هو النادي قصر معاك في ايه ؟ ولا حتي الجمهور قصر معاك في ايه ؟ ده أنت بالنسبالهم ملك متوج ولو حد جيه جمبك الناس بتثور وكانك حته منهم .
ليه بتندمونا أننا حبناكم واديناكم مكانه كبيره، وليه بعد ما الزمالك يرجعكم للحياه من تاني بعد ما اتنسيتوا تسيبوه وتمشوا عشان خاطر قرشين زياده، هيضيفلك ايه في تاريخك أي نادي قطري أو اماراتي ؟ حتي احترافكم في السعوديه في انديه مش بتنافس أصلا بالعكس دي بتصارع علي الهبوط .
بصراحه إحنا اتخنقنا من القصه دي، بقينا عارفين أولها وآخرها، بس أنا نفسي تبص علي اللي قبلك وصل فين أو عمل ايه، واستفاد ايه وندمان ولا لا، والملك مش هيتعامل بأنه ملك برا أرضه، وأنت في الزمالك ملك متوج .
ولو أنت فعلاً عاوز تقعد وشاري، الجمهور أول حد هيطالب إن الإدارة تقدرك، لكن لا هي بالعافيه ولا بالفتونة، عشان هي فعلاً عمرها ماوقفت علي حد، حازم أعتزل وجمال عبدالحميد اعتزل وعمرو ذكي أعتزل، والنادي لسه مكمل .
والمفروض ميرو اللي اللاعيبه عماله تسرسب منه واحد ورا التاني يحافظ شويه علي آخر أملنا، طلاما بتبني زيزو أول واحد يكمل في الفريق وتبني عليه، وأعتقد زيزو دماغه مختلفه عن اللي سبقوه لانه عارف إن مصلحته أنه يكمل في الزمالك، الاحتراف فات اوانه .
عاوز تكمل اهلا وسهلاً الجمهور فاتحلك قلبه ويكفيك فخر وشرف أنك بتلعب في الزمالك ، عاوز تمشي سكة السلامة .
