وائل رياض المدرب بالمنتخب الأوليمبي لكرة القدم ونجم الأهلي السابق .. نشر على صفحته بالفيس بوك “بوست” عن ماهو “المدرب المشروع”
وقدم رؤيته فى هذا الصدد .. فماذا قال ؟
المشروع :
كلمة ( مشروع ) بقينا بنسمعها كتير أوي الفترة اللي فاتت وللأسف واضح إن في ناس كتير بتستخدمها غلط وواضح إن في ناس كتير مش فاهمة معناها ، و ده لازم يتوضح للناس بشكل كبير . هل لما النادي يقول أنا عندي مشروع يقصد به اللاعبين ؟ ولا المدرب ؟ ولا إيه بظبط ؟ ومين اللي منوط بتنفيذ وتحقيق هذا المشروع ؟ وهل المشروع ده قصير الأجل ولا طويل الأجل ولا قصته إيه ؟ يعني مثلاً :
نادي عنده لاعبين صغار في السن وعايز يديهم الخبرة ويخليهم ينافسوا في خلال ٣ سنوات مثلاً يبقي كده واضح إن النادي عنده مشروع في اللاعبين مدته ٣ سنوات وتوقع تحقيق البطولات المتتظرة هتكون بعد ٣ سنوات ، طيب لنجاح هذا المشروع أجيب مدرب معندوش خبرات ومحتاج يتعلم وهو ذات نفسه ( مشروع ) عايز حد يتبناه ولا أجيب حد ذو خبرة عمل المشروع ده قبل كده وأثبت نجاح ؟؟؟؟
طيب مثال تاني علشان الفرق يوضح والناس بعد كده تبقي فاهمة :
نادي مثلاً أو إتحاد عنده مدربين شباب وكوادر فنية ممكن تقود في المستقبل فيبدأ النادي ده أو الإتحاد ده يشتغل علي المدرب ده اللي مؤمن به إنه ( مشروع ) ويبدأ يديله الخبرات والتعليم والدراسة بل والفرصة كمان ويصبر عليه مدة وتبقي دي هي مدة المشروع علشان بعد كده يقدر يقود ، طيب هل المدرب المشروع ده علشان ينجح محتاج نوعية لاعيبة عاملة إزاي ؟ هل نفس نوعية اللاعيبة اللي إتكلمنا عنها فوق ؟ ولا مكس من لاعيبة خبرة وشباب ؟ أعتقد إن ممكن ده وممكن ده ولكن الأسهل من وجهة نظري هي المكس وإن يبقي فيه لاعيبة خبرة موجودة تشيل مع المدرب ( المشروع ) مسئولية الفريق وتساعده من داخل الملعب … حاولت أوضح معني كلمة ( مشروع ) اللي زاد إستخدامها أوي في الكرة الفترة اللي فاتت وكل ده أكيد من وجهة نظري التي تحتمل الصواب والخطأ ….
