ابنة هند رستم: والدتى اتجوزت صالونات وعلاقتها بزوجها تشبه أمينة وسى السيد

حلت بسنت رضا ابنة الفنانة الراحلة هند رستم ضيفة على برنامج “معكم منى الشاذلى”، فى حلقة اليوم الجمعة، على قناة cbc، لتتحدث عن ذكرياتها مع والدتها، وتفاصيل شخصيتها بعيدا عن الأضواء والشهرة.

أكدت بسنت أن والدتها لم تكن تحب لقب “ملكة الإغراء”، الذى أطلقه عليها الإعلامى مفيد فوزى لأول مرة ثم انتشر بعدها، مؤكدة أنها انزعجت للغاية من هذا اللقب، مضيفة: “مكنتش بتحب لقب ملكة الإغراء اللى اداهولها مفيد فوزى وزعلت أوى منه، وقالت له انت كده حددتنى فى دور واحد.. رغم إنها قدمت أعمال تانية مفيهاش إغراء، وإنها فى حياتها الشخصية ست عادية للغاية”.

وعن قرار والدتها بالاعتزال، أكدت بسنت أنها اتخذت هذا القرار لأجل أسرتها، قائلة: “اللى شجعها على الاعتزال إنى لما خلفت وجبت ابنى فكانت هى مبسوطة بالأسرة.. دى واحدة اشتغلت من وهى 15 سنة.. فقالت اعوض السنين اللى فاتت كلها مع بنتى وحفيدى.. وساعدها فى القرار ده إن السينما وقتها مش زى الأول”

وعن علاقة الفنانة الراحلة هند رستم بزوجها الدكتور محمد فياض طبيب أمراض النسا الشهير، أكدت بسنت أن والدتها تزوجته زواجا تقليديا، أو كما يعرف فى وقتنا الحالى بـ”زواج الصالونات”، مضيفة: “فى البيت ماما كانت زى أمينة ودكتور فياض سى السيد.. كانوا بيحبوا بعض جدا مع إنهم اتجوزوا جواز صالونات عادى.. بس قعدوا 50 سنة مع بعض”.

تابعت: “يعنى كان أونكل فياض يرجع من الشغل مثلا الساعة 4 يبقى فورا مفيش صوت فى البيت ولا دوشة وأوامره مجابة وهكذا.. الكابل ده كان حلو أوى أوى مع بعض”.