ياسمين عز لـ منتقدي إطلالة نادية الجندي: إنتوا عايزينها تتقوقع؟ لازم ندعمها
علقت الإعلامية ياسمين عز على منتقدي إطلالة نادية الجندي الشبابية، مؤكدة أنها امرأة مهتمة بنفسها ولا داعٍ للهجوم عليها، كما وجهت عددا من النصائح للسيدات بشأن التعامل مع أزواجهن.
وقالت ياسمين عز خلال برنامجها كلام الناس المُذاع على شاشة أم بي سي مصر: نادية الجندي بنتنا ولازم ندعمها وسنها إيه اللي تحترمه؟ دا إحنا اللي المفروض نحترم سننا، هو عيب الست تحافظ على جمالها؟ أنتوا عايزينها تتقوقع وتكتئب؟ ما تقولي ما شاء الله وادعي ربنا تكوني زيها وقلديها وبدل ما نضايقها بالكلام نشجعها، هو أنتي هتخللي؟ ما كلنا هنعجز.
وواصلت ياسمين عز: نادية الجندي في حالها ولا بتغلط في حد ولا بتجيب سيرة حد وعندها روح شبابية باينة على وشها، وأنا مش بتفرس من كلامكم ولكني بستغرب أنكم بتمسكوا فنانين برا زي جوليا روبرتس وتقولوا الله عليهم مش بيحقنوا وسايبين نفسهم، وتمجدوا فيهم، ونيجي عند بنتنا نادية الجندي نعيب عليها؟ دا المفروض نكون معاها؛ لأن أنا وأخويا على ابن عمي وأنا وابن عمي على الغريب.
كما وجهت ياسمين عز عددا من النصائح للسيدات بشأن التعامل مع أزواجهن، قائلة: كلمة أخيرة للستات اللي بتزهق جوزها بلاش جملة سيب فلوس قبل ما تنزل وأطفي النور وخد كيس الزبالة؛ لأنك من الصبح كدا قفلتيه، والراجل أحسن من الفلوس لأنه بيجيبها إنما الفلوس متعملش راجل، ياما ناس معاهم فلوس ومعندهمش راجل، وأنا وراكم والزمن طويل وإحنا هنا بنقول الصح.
