( احنا فينا اللي مكفينا )
أستاذنا الكبير فاروق شوشة الله يرحمه قال إن أصل الجملة أهل دمياط
وهى إن البورسعيدية وأهل القناة كانوا محتاجين حفلات ثقافية وترفيهية،فبعتوا لهم عمالقة المسرح يوسف بك وهبي وأمينة رزق وبدأوا بدمياط بس مش عارف ازاي اختاروا مسرحية
أطفال الشوارع
دخل يوسف بك بجمله الفخمة ودخلت أمينة رزق طبعا بوصلة الأحزان والبكاء،فحصلت بلبلة في القاعة والناس بدأت تتضايق،يوسف بك انتبه وبص على الجمهور كأنه بيسألهم مالكم؟
راح واحد وقف وقال له ،كفاية بقى يا يوسف بيه، كفاية،اللي فينا مكفينا يا يوسف يا بيه، قولنا مونولوج من شكوكو والناس كلها ردت عليه اه والله احنا مش ناقصين غم،الفرقة المسرحية جالها ذهول والستارة نزلت ورجعوا الفلوس للناس ويوسف بك أقسم ماهو داخل برجله دمياط تاني.
لكن اللي حصل إن يوسف بك بذكاؤه وثقافته عرف إن التيار ها يتقلب ضده،وإنه لازم يغير زي مثلا فريد شوقي ومحمود المليجي،وبدأ أدواره الكوميدية اللي لحد النهاردة كل جملة فيها بحد ذاتها أيقونة،وعمل ده بدون إسفاف وبدون ما تهتز شخصيته العملاقة،بالعكس أدواره الجديدة مع فؤاد المهندس وعادل إمام وفريد الأطرش واللي وصلت للذروة مع سعاد حسني وعمر الشريف كلها كانت وقورة جدا وعشان جدا كانت بتفجر الضحك.
