مرتضى منصور يوجه رسالة نارية لجماهير الزمالك..أنا أو خراب النادي!!
وجه مرتضى منصور رئيس نادي الزمالك رسالة إلى جماهير القلعة البيضاء قبل مواجهة البنك الاهلي غداً الأحد ضمن منافسات الدوري العام، مؤكدًا أن النادي بصدد التعاقد مع مدرب كبير في الفترة المقبلة، موضحاً أنه لن يعلن عن اسمه أو جنسيته حتي لا يتم “تطفيشه” على حد قوله.
وطالب مرتضى منصور جماهير نادي الزمالك في تصريحات تلفزيونية بالهدوء وإيقاف حملات الانتقادات الموجهة إلى اللاعبين بسبب تراجع النتائج في الفترة الأخيرة.
وقال مرتضى منصور، “كل لما نتفق مع مدرب يحصل مشكله، المدرب الألماني جه وقعد وجاله تليفون وقالنا النادي محجوز عليه مين قاله، وقال عاوز أخد شرط جزائي العقد كامل، واحد زملكاوي قال لميدو واقف معهم ليه وأنا عارف مين هو”.
وأضاف مرتضى منصور، “يا جماهير الزمالك من فضلكم أدونا هدنة، إنت زملكاوي؟ علشان تقول مرتضى منصور تم عزله، طيب ياعم أنا مشيت النادي وقع هتجيب مين لو مشيت هأرجع وأكتسح الإنتخاباتـ بنحاول نشوف مدرب، مش معقول نكلم كل مدرب يعتذر البهوات مشوهين صورتنا، الجهاز المصري بقيادة مدحت عبدالهادي اشتغل واللي مكنش ملتزم من اللعيبه إلتزم خلاص”.
وتابع مرتضى منصور في تصريحات تلفزيونية، “الزمالك مش هيقع ولا هينهار، اللي بيحصل لنادي الزمالك بيحصل لأندية كتير في العالم، وكلنا شايفين ليفربول ايه اللي حصله، فيه لجنة فنية مكونة من ميدو وطارق يحيى وإسماعيل يوسف وأحمد عبدالحليم ونجوم كبار، مسؤولة عن اختيار المدرب الجديد، أنا دوري أوفر فلوس، واللجنة دورها تختار المدرب، وهتقيم اللاعيبة في نهاية الموسم”.
واستكمل مرتضى منصور، “البعض من جماهير الزمالك سبب في الإخفاقات، كانوا بيرفعوا صور فيريرا في المدرجات ويقولوا متقربش منه وأنا صوري لأ، أنا بس بتهاجم ساعة الخسائر، أي لاعب يتفاعل عبر مواقع التواصل الاجتماعي، سيتم خصم 25 ألف جنيه من مستحقاته يوميًا”.
