أحمد موسى يعلق على أزمة السجائر: “حيتان بتكسب مليارات شهريا”
علق الإعلامي أحمد موسى؛ على استمرار أزمة السجائر في مصر مشيرا إلى أن الازمة حققت أرباح خيالية لمن اسماهم بـ “الحيتان”.
وقال موسى برنامج “على مسؤوليتي” المذاع على قناة “صدى البلد”: “حضرتك النهاردة بتتكلم على حجم من الأموال رايحة جيوب مجموعة من الحيتان؛ أتمنى من الدكتور مصطفى مدبولي رئيس مجلس الوزراء؛ اللي قاله رئيس الشركة الشرقية للدخان ميتسابش؛ أحنا بنتكلم عن ناس واخدة في الشهر 4.5 مليار جنيه مكاسب من السجائر”.
وأضاف: “الشركة تدفع 85 مليار جنيه ضرائب مع جمارك والفلوس التانية داخلة فلوس الناس؛ أنا بتربح وأستغل وأصدر أزمة للبلد؛ الناس بتلف حوالين نفسها على سجارة؛ عايز سيجارة أو علبة سجائر مش لاقيها؛ هو بيروح يخدها النهاردة سعرها 24 جنيه يخدها بـ 60-65 جنيه دا مبيدفعش الرقم دة في رغيف العيش”.
وتابع: “السيجارة بقت بـ 5 جنيه النهاردة؛ لازم الموضوع دة يتشاف له حل؛ كل يوم بتتكلم على مكاسب خارج المنظومة الرسمية 150 مليون جنيه كل يوم؛ الفلوس دي مع مين؟ دي راحت من الدولة ولا مؤسساتها ودي ناس معرفش بتدفع ضرائب ولا مبتدفعش؛ قالك محدش عارفهم ولكن مؤسسات الدولة أكيد لازم تعرفهم”.
وأكمل: “أنت عملت أزمة للناس اللي بتشرب سجائر الأرقام دي مش بتاعتي دي بتاعة الشركة اللي بتصنع السجائر؛ كل شهر 4.5 مليار جنيه مكاسب رايحة للحيتان وأنا أقعد أشوف القانون متعملش والبرلمان في إجازة هنفضل مستنيين دول لحد ما نشوف التشريع؛ المنظومة اظبطها ازاي؟ لازم تتظبط؛ دور مين النهاردة؟ مسؤولية مين؟ الناس بقالها شهرين بتكلم نفسها وفي الاخر الحكاية فين والموضوع عند مين؟”
وواصل: “الشركة بتطلع العلبة بـ24 جنيه والمواطن بيشتريها بـ 50-60 وممكن 70 جنيه وهيدفع عشان هو عايز سيجارة؛ الموضوع في منتهي الخطوة لازم إجراءات ولازم نوضح تاني؛ أنت بتتكلم على ملايين الناس اللي بتشرب سجائر”.
واختتم: “في الأخر المواطن قدامه الحكومة؛ أي أزمة هيقولك الحكومة؛ كهربا الحكومة سجائر الحكومة ودا صح مش هيقول لا ولكن هنا المنظومة مش الحكومة ومش الشركة يبقي اللي فالنص الحيتان هو دة اللي عامللي الازمة”.
