بعد ظهور نتيجة الثانوية العامة وسوء النتائج كتب الدكتور محمود فرج أخصائي الجهاز الهضمي والكبد والمناظير ومدرس مساعد بكلية طب عين شمس عن كليات القمة وطرح عدة تساؤلات جاءت كالتالي:
هل هي الأكثر وجاهة مجتمعية ؟؟
لأ بل بعضها في كم إهانة لا يُوصف.
هل بيئة العمل لخريجي الكليات دي هي الأكثر هدوء وراحة وخُلوّ من الضغوطات ؟؟
بالعكس بل من أكثرها ضغط وتوتر.
هل هي الطريق الوحيد اللي ممكن تساعد بيه الناس ويكون ليك أثر ؟؟
لأ.
مصطلح كليات القمة هو مصطلح مجتمعي لكنه في الحقيقة خاطئ لا يمت للواقع بصلة .. مصطلح علشان التفاخر مش أكثر في مجتمع بيحب جدا التفاخر والمنظرة ..
ده مش معناه إن باقي الكليات أفضل وفرصها أحسن وفلوسها أكثر ومليانة مميزات ..
ولكن معناه إن عدم تحقيقك لمجموع يوصلك لكليات القمة مش معناه فشل ونهاية طريق .. لا إطلاقا ..
لو مجموعك يدخلك كليات قمة وده طموحك ف افرح بمجهودك واتبسط وألف مليون مبروك ..
لو مجموعك قليل عن كده ف متقلقش .. انت مش هتعرف تغير الماضي لكن ممكن تاخد قرارات تساعدك في تحسين مستقبلك بشكل ما في تعلم مهارات تفتحلك فرص أو تساعدك في بيئة العمل اللي مبقتش واقفة على شهاداتك الأكاديمية أو الكليات إلى حد كبير.
مليون مبروك على الطريق الطويل والصعب اللي قطعته طول السنة لازم تفتخر بنفسك .. وكأب وكأم لازم تفتخر بأبناءك وتفرح بيهم بكل خطوة بذلوها لحد دلوقتي .. ولسه اللي جاي كتير، أكتر وأهم من اللي فات.
دكتور محمود فرج أخصائي الجهاز الهضمي والكبد
