أحمد موسى يطالب منتقدي المشروعات القومية بالاعتذار: “قولوا منعرفش حاجة”
أكد الإعلامي أحمد موسى، أن الدولة المصرية كان لها نظرة استباقية من خلال الربط بين البحر المتوسط والبحر الأحمر بمشروع قطارات السكك الحديد.
وقال موسى خلال برنامج “على مسؤوليتي” المذاع على قناة “أم بي سي مصر”: “الأمريكان عايزين ضرب طريق الحرير أو الطريق الصيني، بكين عاملة الحزام والطريق اللي واخد من آسيا إلى أوروبا والامريكان عايزين يعطلوا الطريق الصيني وقالك نعمل طريق من الهند إلى أوروبا”.
وأضاف: “احنا مستفيدين من جميع الطرق لأن أنت عندك الموانئ بتاعتك والسكك الحديد؛ أنت بتعمل 2000 كم سكك حديد فائقة السرعة؛ أنت حزمت جميع الموانئ المصرية وعندك موانئ جافة عشان تفريغ الموانئ البحرية”.
وتابع: “الموانئ الجافة منتشرة في أكتوبر والعاشر من رمضان وغيره؛ أنت كدولة عملت البنية الأساسية عشان تكون مركز للتجارة؛ ودا مش بالكلام عملت موانئ بحرية وموانئ برية جافة وشبكة سكك حديد فائقة السرعة”.
وواصل: “السنة الجاية خط السخنة والبحر المتوسط السنة الجاية هيشتغل وطابا – العريش شغالين عليه؛ مشكلة الممر اللي من الهند إلى أوروبا أن لحد النهاردة محدش قال هيبدأ أمتي والتكاليف قد ايه وثالثا مناطق فيها مشاكل أمنية حاليا ومستقبلا”.
وأوضح: “الخط يبدأ بري ثم بحري ثم بري ثم سكك حديد ثم بحري؛ أنت محتاج تعدي في مناطق جبال صعبة جدا وإذا عديت محتاج تعدي من مسارات مختلفة؛ المشكلة في مسارات الخط أو الممر ونتنياهو قال هيساعد العالم كله وحركة التجارة وإسرائيل هتستفيد منه ووجه الشكر إلى جو بايدن”.
وأكمل: “اللي كانوا بيسألوا أنتوا بتعملوا ليه؟ المشروع ده حتى الأن مجرد أفكار تنفيذها على الأقل يحتاج 10 سنوات؛ التكاليف باهظة ووضع أمني صعب ولكن هو مشروع مهم بالنسبالنا كمصر معندناش أي مشاكل على الإطلاق؛ أنت كدولة جهزت نفسك وعملت بنية تحتية”.
وذكر: “قناة السويس شغالة والمراكب تيجي من السخنة وبالقطر الحاويات تكون في اسكندرية بعد ساعتين والخط الاخر الممر الأخر الأهم قناة السويس؛ ويبقي عندنا قناة سويس أخرى ولكن على سكك حديد”.
واختتم: “اللي كانوا بينتقدوا يبتدوا يعيدوا حساباتهم بعد الإعلان عن ممر من الهند إلى أوروبا؛ انتقدوا وشتموا وقالوا رميتوا الفلوس وكل واحد قال كلمة في حق مشروع ربط البحر المتوسط بالبحر الأحمر من خلال السكك الحديد لازم يعتذر ويقول إنه ميعرفش حاجة”.
