الشاعر / أحمد إبراهيم خليل
أمي إزاى محبهاش
وهى سبب وجودي
أمي حب ميتحكاش
فهماني حتى في سكوتي
أمي أول كلمه قلتها
أجمل حاجه عرفتها
قبل ما أطلب منها حاجه
تقولي حاضر وقتها
لو هحكى عنها مليون حكايه
مش حب في قصة أو روايه
أمي مش حب عادى
حب مالوش نهايه
أنا لو تعبت شويه
بتتعب أكتر منى
طول الوقت حواليا
عشان تخفف عنى
أنا لما أمي تتكلم
سيبك من كل المدارس
عطاء وحب وتضحيه
فوق طاقة ألف فارس
مهما الدنيا جات عليها
بتتحمل فوق طاقتها
مشتكتش إيه إللى فيها
ماهىَّ خيمه شايله بيتها
أمي عايشه ترضى فينا
وإحنا قولنا حق لينا
ونسيناها وهى فاكره
وبرضوا دايما تدعى لينا
كبرت وضعفت ومش قادره
وبتنسى كتير ومش فاكره
ممكن تنسى أي حاجه
إلا لينا بس فاكره
دي أمي حاله نادره
شكرًا أمي
كلمات
أحمد إبراهيم خليل
