عمرو أديب يكشف مفاجأة عن مدة انقطاع الكهرباء: “هتزيد لساعتين”
علق الإعلامي عمرو أديب؛ على زيادة مدة انقطاع التيار الكهربائي والذي تقوم به وزارة الكهرباء لتخفيف الأحمال.
وقال أديب خلال برنامج “الحكاية” المذاع على قناة “أم بي سي مصر”: “كلمنا وزارة الكهربا قالوا الموضوع مع مجلس الوزراء؛ كلمنا مجلس الوزراء قالك هنشوف ونرجعلك الكلام ده من الضهر ومحدش رد علينا؛ النور بيتقطع واحنا داخلين على الشتا والمدة بتاعة قطع النور بتزيد”.
وأضاف: “قولولنا ياجماعة الوضع دة استثنائي والا مكمل معانا؛ أنا بقولك النور بيقطع ساعتين؛ في نقص في المازوت ماشي في أزمة ماشي طيب ياجماعة قولولنا هيزيد أو نتصرف أو ايه السبب ماشي”.
وتابع: “في شيء لم يختفي ومش سر أن النور بيتقطع وكتير؛ أنا بس بين قوسين عايزيني أقولكم والا مقولكمش؛ كان يبقي من دواعي فخري أني أجي أقولكم النور هيتقطع بكرة زيادة ولكن لا دا منشور في كل المواقع”.
وأكمل: “قولي وأنا اصدقك حتى لو شفت النور بيقطع قدامي هقولك أن أنت صح؛ زي ما طلبت من 3 أشهر والناس قالت عمرو أديب وعنده اجندة؛ احنا عرفنا الخبر الأول من الرئيس؛ قعدنا وقت طويل نسأل؛ قولولنا أصل دة مش سر لما النور بيقطع بنعرف”.
وأوضح: “وارد جدا يبقي في مشكلة وهنستحمل أحنا مع بلدنا ونتصرف؛ وبعدين يبدو فاكرين قالوا مواعيد الساعة كذا هيقطع كل دة راح مفيش مواعيد خلال؛ أرجوكم قولولنا ايه الحكاية واية الموضوع عشان نوضب حياتنا”.
وأكدت مصادر أنه لم يتم تحديد موعدًا حتى الآن لإنهاء فترة تخفيف الأحمال الكهربائية عن المنازل والأماكن السكنية، وأن كل ما ينشر أو يذاع في هذا الصدد عار تمامًا من الصحة، ولا يمت للحقيقة بصلة.
وأشارت المصادر إلى أن تعليمات فصل التيار الكهربائي عن المنازل تكون وفقًا لحجم القدرات المطلوب فصلها على مدار اليوم، والتي تتم بتنسيق بين شركات توزيع الكهرباء على مستوى الجمهورية، ووحدة التحكم القومي التابعة لوزارة الكهرباء.
وشكى مواطنون من زيادة فترة انقطاع التيار الكهربائي من ساعة إلى ساعة ونصف وربما ساعتين وهو أمر لم يكن معتاد خلال فصل الصيف حيث كان يتم تخفيف الاحمال بالتبادل بين المناطق لمدة ساعة يوميا.
