هالة عصفور
انا بنت بيت الصبر
عايشاها بالقدرة
زهرة. ف أرض الريف
مفتونة بالخضرة
غير قلبها الطيب
مش فاكره من جدي
غير بشرته السمره
فلاح وغيطه كبير
وانا كنت بنوته
بتلاعب الفراشات
وتعاكس العصافير
والساقية والتوتة
والحضن من أمي
ف البرد حدوتة
فارقتي ليه بدرى
أحضاني يا قمرة
دوقت الفطام بدري
وانا لسه محتاجة
للنصح والعبرة
أمي يا وش الخير
طبليتك فضيت
م الاكل واللمة
راح فين وابور الجاز
والمش ف البلاص
والفرن والقله
واللي جرى يا أمه
سواني ف الغمة
كل السكك عتمه
غرقانه ف الضلمه
ومافيش طريق سالك
رايح علي بكره
سِبّْحة حبايبنا
أتفرفطت منا
حبة ورا حبة
ما فضلش ولا حبة
في البعد والغربة
اتوزعوا يا أمه
معلولة ميت علة
م الكدب والتزييف
للصمت مضطرة
يا بلسم الأوجاع
فينو الدوا بتباع
بالدعوة والرقوه
من إيدك الطاهرة
