عمرو أديب لـ الحكومة: لازم تعملوا حاجة أنا شفت مواد غذائية بتتباع بالتقسيط
أكد الإعلامي عمرو أديب أن أسعار السلع أصبحت تزيد بشكل غير طبيعي، مشيرا إلى أن الدولة لا تتحرك بالشكل الكافي لمواجهة هذا الارتفاع الجنوني.
وقال أديب برنامج “الحكاية” المذاع على قناة “أم بي سي مصر”: “لا أحد يفعل شيء ونحن قاعدين بنشاهد قدرة الخالق في الحياة والعباد؛ احنا قاعدين النهاردة الحديد بحاجة وستين؛ والدولار بكام؟ والفرخة كانت بتزيد كام ودلوقت كام؟ هنعمل أيه في الموضوع ده هل اللي بيجرى ده طبيعي أو عادي؟”.
وأضاف: “ياجماعة روح جنب أي سوبر ماركت هتلاقي جنب الكاشير كمية من البضائع الناس مرجعاها اللي هو ليه بقت بكام؟ هو أنا هخزن جبنه بيضا وجبنه رومي؟ أنا النهاردة شوفت مواد غذائية بتتباع بالتقسيط هو ايه اللي بيجرى؟”.
وتابع: “أنا بقول لكل التجار هيجي وقت اللي هو أنا ممعاييش ياجماعة أنتوا بتدمروا السوق واللي طلعوا قالولنا هنحط الأسعار على السلع مفيش سلعة فيكي يا مصر عليها سعر أنتوا أضعف من التجار؛ طيب أنتوا ناويين تعملوا حاجة ياجماعة؟”.
وواصل: “محدش يقولي قاطع دا الناس بتشتري اكلها؛ في حد بيقول نعمل حاجة؟ طيب احنا خلاص خلصنا على وزير التموين الأسبوع اللي فات؛ الغلاء موجود في العالم كله ولكن إيقاع الزيادة عندنا سريع أوي”.
وأكمل: “وزير التموين قال امبارح احنا هنرفع القمح من البورصة عشان بيضاربوا فيه؛ ياجماعة لازم تعملوا حاجة أنا لا مع القبض على الناس أو المداهمات طيب ناويين تعملوا ايه؟ احنا عاملين زي المصارع والأسد في الحضارة الرومانية؛ المصارع دة المواطن والأسد هو الأسعار وعمال يشلفط في الناس”.
وذكر: “هيجي وقت السلعة موجودة وأنت مش قادر تشتريها؛ الحاجة موجودة وكل حاجة ولكن سعرها مش قادر عليه طيب كلموا الناس؛ الحاجة فعلا بقت صعب وفي ناس كتير بطلت اللحمة”.
واختتم: “ياجماعة ياللي في الحكومة متزهقوش المعركة مش قصيرة ولازم تعملوا جهود أكتر احنا داخلين على رمضان ولازم يكون في اجتماعات واضحة لتقليل الأسعار وأن يكون في بضاعة أكتر في السوق؛ ومفيش حاجة مبتزيدش ولازم تحاولوا تعملوا حاجة”.
