أحمد موسى للتجار: الدولار أتوفر ومعادش عندكم حجة.. ليه الأسعار مبتنزلش؟
أكد الإعلامي أحمد موسى؛ أن أسعار السلع في الأسواق لم تتراجع بقدر تراجع الدولار وتوافره في القطاع المصرفي الرسمي.
وقال موسى خلال برنامج “على مسؤوليتي” المذاع على قناة “صدى البلد”: “رئيس الوزراء عمل اجتماع النهاردة مهم جدا؛ اجتماع النهاردة يتعلق بالأسعار؛ قعد مع الناس المعنيين قالهم ياجماعة النهاردة كنتوا بتشتكوا؛ الدولار ومش لاقيينه طيب النهاردة الدولار موجود المواطن مبيحسش ليه أن الأسعار نزلت”.
وأضاف: “من المفترض أن الناس تحس نزول في الأسعار؛ في بعض السلع أسعارها نزلت ولكن مش دا النزول اللي منتظرينه؛ رئيس الوزراء تحدث بلسان المواطن وطلب اجتماع استثنائي مع الغرف لخفض الأسعار بقدر انخفاض سعر الدولار”.
وتابع: “قالهم يتعمل اجتماع استثنائي عاجل عشان نجد الأسعار نزلت ومينفعش النهاردة الأسعار زي ما هي وعلى العكس الأسعار بتزيد؛ تكاليف المنتج النهاردة أقل من الأول والأول كنت بتجري وتلحقوا وتقولوا مش لاقيين دولار طيب النهاردة الدولار موجود عندك”.
وواصل: “ارجوا من السيد رئيس الوزراء لابد من إجراءات بمعني الكلمة في ناس يحبوا يكسبوا مليارات؛ ومش مهم الشعب لا الشعب مهم جدا ومسؤولية الحكومة ورئيس الوزراء مواجهة المنتجين والصناع والغرف التجارية كلها”.
وأوضح: “لما كنتوا بتقولوا مش لاقيين كنا واقفين معاكم ولكن النهاردة الدولار موجود مش هقف معاك؛ انتوا مسؤولين عن الجشع الموجود وحالة عدم نزول الأسعار في ناس منكم مسؤولة عن دة ودا دور الحكومة ولازم الحكومة تبدأ وبقولها بشكل علني العين الحمراء؛ لازم العين الحمراء لان دي دولة أصل هفضل اسيب الناس لمجموعة كدة بيتاجروا في الناس ويتحكموا في الأسعار”.
واختتم: “الدولة عملت اللي عليها وزيادة الدولار أرخص من السوق الموازي؛ طيب انت الأول بتقول أنا مش لاقيه؛ يطلع رئيس الوزراء في اجتماعات أنه عندنا ازمة وهنحاول نواجه والدولة بتعمل افراجات كل يوم؛ ايه الحجة اللي عند أي واحد مسؤول عن سلع ايه مشكلتك النهارده حد يطلع يقول؛ ميقدرش يقول الدولار زي ما كانت بيقول قبل كدة بقي عندنا الحمد لله دولارات؛ أقل من شهر داخل البلد حوالي 58 مليار دولار”.
