عمرو أديب:أقطعوا الكهربا صح.. متبقوش فاشلين في قطع النور
أكد الإعلامي عمرو أديب، أن فترات تخفيف الأحمال زادت، مشيرًا إلى أن على وزارة الكهرباء أو مجلس الوزراء توضيح الأمر.
وقال أديب خلال برنامج “الحكاية” المذاع على قناة “ام بي سي مصر”: “كان طموحي وكان أملي إننا منقطعش النور في الأسبوع ده، دلوقتي أنا غيرت شوية طموحي وغيرت شوية أملي أنا بناشد الحكومة لو سمحتم متقطعوش النور أكتر من ساعتين، أنا طموحاتي انخفضت أرجوكم النور بقي يقطع أكتر من ساعتين وأكتر من مرة، والأجهزة بتبوظ بالآف”.
وأضاف: “ياجماعة أنا طالب تبقوا ناجحين في قطع النور، إذا كان من قطع النور بد فليس من العقل أن تضيع حياتنا، حر فاهمين ضغط فاهمين، مفيش فلوس مش عارفين، ماشي أنت ناوي تكمل كده، النور بقى يقطع أكتر من ساعتين وفي أي وقت مبقاش في من 11 إلى 5 أو من 3 إلى 6 النور بيقطع في أي وقت وأنا عايز حد يقولي لا”.
وتابع: “جائز الناس في الوزارة ميعرفوش النور بيتقطع أمتى، اللي بيحصل دلوقت بقى عبث، اقطع النور بس اقطعه صح، بعد ما يتقطع الساعتين أو الساعتين ونص يبتدي يلعب، هو في ايه؟ هو ليه الموضوع محدش بيرد خالص”.
وأكمل: “في المرة الأولانية الريس قالكم اطلعوا كلموا الناس، أنا عارف بتعتبروني مش موجود أطلعوا أسالوا الناس، وارد يبقى الضغط كتير اطلعوا قولوا عفوا إحنا عندنا مشكلة النور بيتقطع مننا، هو فيها إيه لما تقول أسف وتاخد بخاطري”.
وأوضح: “وزارة الكهربا تقولك كلم البترول تكلم البترول يقولك كلم مجلس الوزراء، ومجلس الوزراء يقولك هنشوف ونرد، النهاردة السيد وزير المالية قال الدعم الموجود على الطاقة جريمة ماشي، طيب هنعمل إيه؟ أنا فهمت تصريح السيد وزير المالية وأنا عايز أسال سؤال مش انتوا قولتولنا في ناس بتدفع تمن الكهرباء كلها ويبقى في تكافل للشرائح التانية؟”.
وذكر: “أنا مش طالب حاجة أنا كنت أهبل وساذج لما قلت يا ريت يا جماعة لو تقدروا، بلاش اقطع النور يبقى بنجاح مش بفشل، أنت بتقطع النور اقطعه صح أو خدونا معاكم يا جماعة قولولنا مثلا، الناس بتبقى مخنوقة في الحر”.
واختتم: “الناس مش مبسوطة حاجة تضايق ماشي ظرف قاهر ماشي بس كلمني بقى، قولي أنا أسف جدًا النور بقى يقطع زيادة، دا بيقطع زيادة عن البهوات وبيقطع كتير أوي في حتت تانية”.
