دعاء غباشي نجمة الكرة الطائرة الشاطئية : لعبت بإصبع مشروخ فى باريس

على صفحتها الشخصية بالفيسبوك كتبت دعاء غباشي نجمة منتخب مصر لكرة الطائرة الشاطئية بوست كشفت فيه انها لعبت فى احدي مباريات دورة باريس الأولمبية وإصبعها مشروخ وأكملت المباراة حتى النهاية .

قالت دعاء بالنص :

الكلام ده للناس الي فجأه عرفوا ان في لعبه اسمها كره طائره شاطئيه

اللعبه دي تقريبا تاريخها في مصر من ساعه ما دخلت ٢٠١٤ يعني مبقلناش١٠ سنين

الحمد لله تقريبا برضه من ساعه ما لعبنا كل بطولات افريقيا وعرب بنكسبها

عايزه بس اشرح حاجه عشان فاضيين وفلاسفه الفيسبوك الي ظهروا فجاه وبياخدوا كلام من علي لسان اللعيبه الي هما احنا وده طبعا اي كلام ومش حقيقي

ويقلك اللعيبه قالت واللعيبه عادت واحنا اصلا منعرفش مين دول

تأهل الاوليمبياد لينا عن طريقين ال توب ١٦ الي هما احسن ١٦ فرقه علي العالم وابطال القارات وطبعا احنا اتأهلنا عن طريق بطل القاره افريقيا يعني لا كوته ولا واسطه زي ما بيتردد الكلام وبمجهودنا وتعبنا يعني مش حد لعب وكسب واحنا الي سافرنا لا هو احنا الي لعبنا لحد ما اتأهلنا

احنا شهر ٣ كنا ٢٤٧ علي العالم في الرانك

لعبنا الالعاب الافريقيه وبطولتين برو تابعه للاتحاد الدولي وبطوله افريقيا المؤهله بقينا ٦٠ علي العالم

ف احنا تقريبا في شهرين او ٣ شهور دخلنا ال توب ١٠٠ وقربنا من ال ٥٠ وده برضه مجهودنا يعني مخدناش تعب حد هما هما البنتين الي بيلعبو ولا واسطه ولا اي حاجه

طبعا احنا لو مشاركناش في افريقيا غيرنا هيشارك ونبقي ادينا افضليه لبلد تانيه افريقيه تطلع علينا لان لازم مقعد افريقي

وبالنسبه للعبه الي مش بتتلعب غير علي شواطئ لا هي بطولات العالم نصها تقريبا لو مكنش كلها مش علي شاطئ وعادي بنعمل ملعب في اي مكان مش لازم شاطئ عشان الي رابطين الشاطئيه بالشاطئ سعات بيكون ضرره اكتر من نفعه عشان الهواء

احنا مش المركز الاخير زي ما بيتردد الكلام احنا عملنا متشات جامده جدا مع ابطال اللعبه وطلعنا معاهم اسكورات كويسه جدا وفي ماتش من المتشات ودي اول مره هقولها صباعي اتشرخ وحطيت بلاستر وكملنا عادي

والله العظيم فرقه البرازيل مكانو عاملين حسابنا بعد الماتش جم سلمو علينا وحضنونا وقالولنا احنا مكناش مصدقين المستوي وفرقه اسبانيا بعد الماتش جايين يقولولنا ايه ارسالتكو دي انتو اجمد ارسالات اتلعبت علينا

متخيلين اما يبقوا ملوك اللعبه بيقولولنا كده ولا الجمهور الي انالنا اعجابه وكان بيشجعنا

الكلام ده انا بقوله عشان حاجه واحده احنا الناس بقت تحترمنا في كل العالم

بطله اوليمبياد ريو ٢٠١٦ وصاحبه الذهب اخدت المركز الي بعديينا يعني احنااسكوراتنا احسن منها في الاشواط

محدش بينط من المركز ال ٦٠ للمنافسه علي ميداليه بعد ١٠ سنين من وجود اللعبه ابطال اللعبه بقوا ابطالها بعد قد ايه حد يقولي كده ؟!

ف مش محتاجه مزايده علي بعض ومحدش يعملي منشن تاني عند صحفي عايز يركب الموجه علي قفي اللعيبه

ارجوكم بلاش تصفيه حسابات ملهاش لازمه علي قفي اللعيبه

اتمني اكون وضحت للساده المحنكين بتوع الفيسبوك والميديا ومحدش ياخد اي تصريح علي لساني غير من علي صفحتي الشخصيه وشكرا