أحمد موسى: البلد تعرضت لنكبة في 2011 وندفع ثمنها حتى الأن
علق الإعلامي احمد موسى على دعوات البعض لهدم الدولة وتكرار ما حدث في يناير 2011 مشيرا إلى أن المواطن هو من يدفع الثمن في النهاية.
وقال موسى خلال برنامج “على مسؤوليتي” المذاع على قناة “صدى البلد”: “اليومين اللي فاتوا بتابع بعد مواقع السوشيال وتلاقي ناس كانت مستخبية وبدأت تظهر كانوا بيتكلموا يلا بينا نهد البلد تاني ماهي اتهدت في 2011 وبدأوا يشتغلوا والقصة إياها اللي انتوا عارفينا ويبدأوا يهيجوا الناس ويستغلوا أي حاجة تحصل في البلد ويلا”.
وأضاف: “حصل في 2011 البلد تعرضت لهذه النكبة الكبيرة والبلد اتخربت في 2011 ولحد النهاردة بعد 13 سنة بتدفع التمن ده في 2011 كان عدد سكان مصر 80 مليون والنهاردة 106 مليون مواطن يعني زدنا 26 مليون في 13 سنة”.
وتابع: “اللي كان عندنا وإيراداتنا ودخل مصر واحنا بلد مش عندها دخل كل يوم مليار عندنا ستر ربنا ولما يبقي ربنا ساترها معاك تفكر تاني أو تكلم تاني شوف الأول اللي حصل ف 2011 وقيس عليه أي امر اخر وكل حاجة موجودة دلوقت وبتشوفها تداعيات ما جرى من 13 سنة”.
وأكمل: “الناس قامت طيب لما قمت ماذا فعلت؟ البلد تحسنت في 2011-2012 وبنيت وشوفت احتياجات الناس؟ شوف الدولار وقتها كان بكام والنهاردة بقي بكام يبقي أنت ايه اللي عملته؟ لازم نفكر في كل اجراء بيتاخد والمواطن بيدفع التمن غالي والمواطن لازم يخلي باله من كل تحرك وأي محاولات لاستهداف البلد وهما مش هيبطلوا وبيحاولوا في بعض الدول وعملوها في بعض الدول ومرجعتش ومش راجعة تاني”.
وذكر: “في دول مازالت لحد النهاردة من 2011 واحنا الحمد لله واحنا ماشاء الله امن وأمان واستقرار واه بنتكلم عن الأسعار وفي مشكلة أسعار مبنقولش لا ولكن ايه هو المقابل لده؟ بناء الدول بيحتاج شغل وفي ناس مبتنامش ودولة مبتنامش ليه؟ كل اجراء النهاردة محتاج مليارات عشان توفره”.
