هاجم أمير عزمي مجاهد نجم الزمالك السابق، رحيل جروس من الجهاز الفني لنادي الزمالك.
وقال أمير عزمي مجاهد عبر برنامج الكورة مع فايق على قناة ام بي سي مصر 2 : ” الواحد زملكاوي إبن زملكاوي، بالنسبة لي الزمالك أنا فيه من وأنا صغير، حبه بداخلي،
لكن أنا مش زي ناس من داخلها لا يوجد حب ومن الخارج يقبلوا القمصان، أتمنى جمهور الزمالك يفرق بين الزملكاوي وبين إللي بيتزملك، في منهم كتير جدًا، ربنا شاهد على الواحد، وربنا يعلم إن أي وقت أكون موجود فيه في الزمالك أفعل كل ما بوسعي”.
وتابع : ” أنا نزل وزني بسبب الزعل، أنا زعلان جدًا، مينفعش مدير فني زي كريستيان جروس حقق 16 بطولة وأعلى مدرب سويسري، ويتقال عليه قلة أدب، إنك تشكك في صحة بني آدم دي قلة آدب وعدم تربية، إنت بتتعامل مع بني آدم مش مدير فني”.
وواصل : ” يا رب يبقى عندي 70 سنة وتكون عندي نفس ذاكرته، ده أنا كنت بنسى وهو إللي بيفتكر، إللي خرج الكلام ده من لجان ومن أشخاص داخل النادي، المفترض إن إللي يطلع حاجة زي كده يكون ذكي، لكن إللي عملوا كده أغبياء”.
وأكمل : ” زي ما يكون سكريبت متوزع، أول شيء الزهايمر تاني شيء بعد أي خسارة يطالبون برحيله، في يوم من الأيام الناس دي هتتكشف، أنا مش هوجه الكلام لناس وأقول أسمائهم، لكن قسمًا بالله أنا عندي القدرة إني أقلعها هدومها”.
وشدد : ” معروف اللجان ومعروف مين في الجهاز الفني إللي كان بيبلغ الإدارة، وجروس كان عارف مين من داخل الجهاز الفني يقول للإدارة إلحقوا الفريق، وجروس كان عارف لكنه أكبر من كده ولا يتعامل مع هذا الجانب المنحط، وكان بيقولي عايزين نكسب المباراة القادمة”.
وأتم : “يكفي إنه يوم أن تم إبلاغه بالرحيل كان يذاكر بتروجيت وجهز للماتش ثم اجتمع مع اللاعبين ورحل”.
