كشف أمير عزمي مجاهد مدرب الزمالك في جهاز السويسري جروس عن حقيقة أزمة شيكابالا وجروس بعد لقاء انيمبا في الكونفدرالية.
وقال أمير عزمي عبر برنامج الكورة مع فايق, ما تردد إن في مشكلة بين جروس وشيكابالا؟ ” ما حدث بعد مباراة الزمالك وإنيمبا وإحنا داخلين الباب كان مقفول، أنا فهمت إن في مشكلة في الأوضة جوه، عرفت إن شيكابالا كان غاضب”.
وواصل : ” أخذت المدرب على المؤتمر الصحفي وخلصه ورجعنا الأوضه، إنت كمدرب مساعد لازم تلم المشكلة ومش كل مشكلة تصدرها، أنا أخذت الرجل على المؤتمر ورجع وحس إن الأوضة فيها هدوء رغم إن الفريق كان فائز”.
وتابع : ” لكن الرجل شعر بأمر ما وأحد معاونيه حكى له ما حدث، في اليوم التالي جروس قال لشيكابالا في الملعب إنت قائد الفريق ولو في مشكلة في أوضة اللبس حلها، والموضوع انتهى على كده لكن كل إللي اتقال إن حدث اعتداء من اللاعب على المدرب لم يحدث وكذب”.
وأكمل : ” في ناس كانت بتسرب التشكيل قبل ما نتولى المسؤولية، وده محصلش لما جينا، في خونة داخل الجهاز الفني وأنا بقول الكلام على مسؤوليتي وأحط صباعي في عين التخين،
في ناس داخل الجهاز قالوا للاعبين قبل مباراة فاركو إن المدرب هيمشي، أنا مقلتش للراجل وبعد الماتش قلت له بيني وبينه قالي أنا مش مهتم أنا بفكر في مواجهة بتروجيت وعايز ألاعب الأهلي وأواجه كولر إللي كان لاعب عنده قبل كده” .
وأتم : ” الناس عارفه أنا اقصد مين، وفي يوم من الأيام سأقول، أنا لازم أعرف الناس إيه اللي بيحصل، أنا ممكن أذوق الكلام قبل مباراة الأهلي، لكن أنا مش هعمل كده، ومش هعمل زي ناس بتفضل في النادي وتستفاد من وراه”.
