سألت الفنانة والمذيعة دينا عبد الله الفنانة الكبيرة الراحلة النجمة مريم فخر الدين عن رأيها فى الفنان الموسيقار الراحل فريد الأطرش .. فكان هذا رأيها بالنص :
دينا : لو سألت حضرتك عن فريد الأطرش تقولي عنه ايه ؟؟ لان كل النجمات والنجوم اللي كانوا معايا في البرنامج قالوا عنه انه قد كده كان انسان كريم وحنين ولطيف وبيحب الناس
مريم : كان بيحب الناس اوي ، شوفي فريد ميقدرش يتعشى لوحده ابدا ، لو اتعشى لوحده ينتحر. ، ميقدرش يتغدى لوحده لازم 20 نفر على الترابيزة ، ولو انا غلطت وعزمت فريد عندي في البيت يجيب معاه ال20 نفر اللي هو اصلا كان عازمهم من الاول يجيبهم معاه .. هقولك حاجة عن فريد ، مرة كنت عازماه وكان عندي طباخ وراه مش عارفة عزومة ولا عايز يروح كل شوية يقولي “أغرف يا ست ؟؟” ، أقوله “تغرف ايه ؟! لسه الضيوف مجوش” .. فأنا قعدت أبص من البلكونة لحد ما لقيت فريد بيحود بالعربية وجه ، جالي الطباخ “اغرف يا ست ؟” ، قلتله “خلاص اغرف” .. فريد قعد ساعة مطلعش ، انا كنت في رابع دور يعني يطلع في 3 دقايق فنزلت أشوفه مطلعش ليه ، هو كان دايما يمشي أي حتة معاه العود بتاعه ، جه البواب بتاعنا عم عثمان قاله “يا فريد تعالى غنيلي” فقعد فريد جنبه على الدكة وطلع العود وقعد يغني “انا وانت .. انا وانت” والله وكان لامم كل شغالين العمارة بتاعتنا والعمارة اللي جنبينا وبتوع الجراج وعمال يغنيلهم ومش عايز يكسر مزاجهم .. شوفي فنان قد ايه
