نداء من أسر شهداء “حريق أكتوبر”: “ولادنا ماتوا محروقين يا ريس”

وجع أهالي واسر ضحايا ( شهداء) حادث حريق إنفجار ماسورة الغاز فى مدينة 6 أكتوبر لايزال مستمرا ويبدو أنه لن ينته بسهولة .. هذه الأسر الذين يستحقون كل الإهتمام والرعاية “و “الطبطبة” لايزالوا فى إنتظار من يرد حق فلذات أكبادهم ويعاقب من تكاسل وأهمل وتسبب فى هذه النهاية الحزينة للضحايا الشهداء .

الأستاذة أميرة عصام سالم شقيقة الشهيد الراحل محمد أبن الناقد والإعلامي الرياضي المعروف عصام سالم عبرت عن هذه المشاعر التى تنتاب أسر الضحايا ، وكتبت عبر صفحتها على الفيس بوك نداء إلى كل المسؤولين بكلمات مؤثرة قالت فيها :

ولادنا ماتو ا محروقين يا ريس

ماتوا محروقين مرعوبين متعذبين مغدور بيهم

وما حدش جاب سيرتهم كإنهم ولا حاجة كإنهم هوا ما تولدوش اصلا

ماشيين في أمان الله زي اي حد فينا اتفحموا واتعذبوا وماتوا في مكانهم

واللي نجا مات بردو بعد رحلة عذاب اسبوعين عمليات وترقيع جِلد في الاخر ولادنا راحوا كلهم ورا بعض زي السبحة

ارجوكم اقفوا جنبنا شاركوا صوتنا

ماتسيبوش حقنا يضيع

اقفوا جنبنا وشيروا البوست على قد ما تقدروا يمكن وقفتكم تغير الواقع اللي احنا فيه وصوتنا يوصل..

مش عايزة أصدق إن اللي راحوا دول ماحدش جاب حقهم واتغدر بيهم بالسهولة دي

من غير ما حد يطلعله صوت

كلنا بشر ووجعنا واحد وحقنا لازم يرجع

ارجوكم ساعدونا نطفي حرقة قلب أمهاتنا

محمد اخويا اللي راح وسما ومنة وحذيفة ومحمود وتميم طفل سنة ونص اتفحم هو وأمه في حضن بعض واتدفنوا في كفن واحد

وحذيفة شاب عبقري ذكي مجتهد في مجاله كان عنده طموح يطور في الموبايلات وامكانياتها راح غدر هو ومحمود صديق عمره

وسما طالبة كلية الاسنان ربنا انقذها من الموت بأعجوبة في حادث سير واتعافت واتعالجت عشان تموت بردو متعذبة ومحروقة وهي رايحة تناقش رسالة الدكتوراه بتاعتها

ومصطفى حجازي شاب في عمر الزهور ومازال بيصارع عشان يعيش وبين الحياة والموت

واهله وزوجته كل لحظة بيموتوا كل ما يسمعوا ان حد من المصابين مات

ومحمد اخويا شاب ٣٤ سنة ناجح مجتهد بيحب الحياة شخص مبهج لنفسه ولكل اللي حواليه محبوب من كل اللي يعرفه

راسم لنفسه طموح وأمل انه يكوِن أسرة ويجيب اطفال راح كل ده في لحظة

ومحمد ده تاني ابن لأمي يروح بعد ما اخوه الكبير اتوفى فجأة من ١٥ سنة وكان شاب جميل مهندس في عمر الزهور ٢٦ سنة

امي سبقها اتنين من ولادها عالجنة

راضية ومحتسبة بس عايزة حق ولادنا يا ريس

ليه ام تحس نفس الوجع مرتين نفس القهر والفقد مرتين

حرام حرام حقهم يضيع وقلوب اهلهم تتحرق عليهم كدة

سايبين وجع وقهر وحرقة قلب ومافيش بني آدم اتهزله شعرة ولا اتحرك له ساكن

حقهم عندك يارب

حسبنا الله ونعم الوكيل

وعند الله تجتمع الخصوم

وانا لله وانا إلبه راجعون