أبدى الكابتن أيمن يونس، نجم الزمالك الأسبق، استياءه الشديد من طرح اسم عبدالناصر محمد كمرشح محتمل لتولي منصب مدير الكرة في نادي الزمالك، مؤكدًا أن هذا الطرح لا يليق بتاريخ النادي وهويته.
وقال يونس خلال ظهوره على قناة “أون سبورت”: “ترشيح عبدالناصر محمد؟ مش قادر أصدق إن ده ممكن يكون تفكير مسؤول جوه نادي الزمالك بصراحة شديدة.”
وأضاف: “حتى لما جيه الكابتن أيمن الرمادي في توقيت صعب، وهو راجل محترم جدًا، ساندناه لأنه كان جاي في مهمة إنقاذ. لكن عبدالناصر؟ ده قرار قاتل بصراحة لو حصل.”
وتابع يونس منتقدًا غياب أبناء الزمالك عن الملفات الحساسة:
“مكان مدير الكرة أبناء الزمالك شاطرين فيه جدًا. عندنا أسماء كتيرة تقدر تعمل نظام وانضباط يليق بالمكان ده، والمرحلة دي محتاجة أبناء النادي.”
وأشار إلى أن الزمالك يمر بلحظة حرجة على المستوى الجماهيري:
“الزمالك في مفترق طرق حاليًا مع جماهيره. الجمهور هو اللي كسب كأس مصر، والأولى إنك تجهز كوادر من ولاد النادي، سواء إداريين أو فنيين.”
واختتم رسالته الموجهة إلى مجلس الإدارة بقوله:
“اللي بيحصل محتاج مراجعة. الزمالك ما ينفعش يمشي إلا بولاده.”
