أطلق الإعلامي كريم حسن شحاتة، عبر برنامج على قناة “الحياة”، تصريحات صريحة تناول فيها التغييرات الجذرية التي أحدثها جون إدوارد، المدير الرياضي لنادي الزمالك، مؤكدًا على ضرورة الحفاظ على هوية النادي في المناصب الحساسة، وعلى رأسها منصب مدير الكرة.
وقال كريم: “جون غيّر كل السيستم جوه نادي الزمالك، من الجهاز الفني والطبي والإداري وحتى عمال غرفة الملابس.. وجاب جهاز جديد بالكامل مع المدرب يانيك فيريرا، وده من حقه، بس اللي مش من حقه هو إن ميبقاش في أي رمز زملكاوي ضمن التشكيل الجديد”.
وأشار إلى أن كل نادٍ كبير يتمسك بهويته ورموزه، موضحًا: “النادي الأهلي عمره ما جاب مدير كرة مش أهلاوي، من أيام طارق سليم، ثابت البطل، سيد عبد الحفيظ، ومحمد يوسف.. دول واجهة النادي، وده اللي الزمالك محتاج يعمله”.
وأضاف: “أنا مش ضد التغيير، بس منصب مدير الكرة تحديدًا مينفعش يروح لحد ملوش تاريخ أو انتماء واضح للنادي، مش علشان الكابتن عبد الناصر محمد شخصية وحشة، بالعكس، هو محترم جدًا، بس عايزين واحد زملكاوي عنده كاريزما وهيبة يعرف يتعامل مع الإعلام واللاعبين، ويكون همزة الوصل بين الإدارة والمدرب”.
وختم كريم رسالته قائلًا: “يا جون، أنت راجل ناجح وشاطر وكلنا بنحترمك، بس متخليش كل الناس تبقى ضدك، حافظ على شخصية نادي الزمالك، وسيب على الأقل منصب مدير الكرة لرمز زملكاوي يمثل هوية النادي”.
