علّقت الفنانة إلهام شاهين على الفيديو المتداول لها بصحبة الفنانة هالة صدقي خلال حضورهما جلسة تكريم المخرج الراحل يوسف شاهين، ضمن فعاليات الدورة الثامنة من مهرجان الجونة السينمائي، والذي أثار جدلًا واسعًا عبر مواقع التواصل الاجتماعي، حيث اعتبره البعض سخرية من حديث الفنانة لبلبة أثناء كلمتها في الجلسة.
وقالت إلهام شاهين في تصريحات إعلامية إن الموقف فُهم بشكل خاطئ تمامًا، موضحة: “أنا مش المفروض أقول كنا بنقول إيه، بس الحقيقة كنت بقول لهالة صدقي: أنا هموت وأروح التواليت، وهي ردّت عليّا بهزار وقالتلي اعمليها مكانك علشان الندوة قربت تخلص، وعشان كده شاورت ليسرا تخلص بسرعة”.
وأكدت شاهين أن الأمر لا يمت بصلة للفنانة لبلبة، قائلة: “دي صاحبتي وعِشرة عمر، ومينفعش أبدًا أتصرف بالشكل ده معاها، ومفيش بينا غير المحبة والاحترام”.
وأعربت شاهين عن دهشتها من الانتقادات، قائلة: “الناس ليه بيفكروا كده؟ يمكن عشان بيتنمروا علينا طول الوقت، فمتخيلين إننا كمان بنتنمر على بعض، بالعكس إحنا كفنانين متماسكين وأصحاب جدًا، ومفيش حاجة ممكن تفرّق بينا”.
واختتمت حديثها بالتأكيد على أن البعض يحاول افتعال الأزمات دون مبرر، مضيفة: “اللي بيتصيدوا لنا بيطبقوا المثل اللي بيقول: حبيبك يبلع لك الزلط وعدوك يتمنى لك الغلط، وواضح إننا بقينا أعداؤهم من غير سبب، عايزين يخلقوا لنا غلط، مش لاقيين فبيخترعوه”.
وتأتي تصريحات إلهام شاهين لتضع حدًا لحالة الجدل الواسعة التي رافقت انتشار الفيديو خلال الساعات الماضية، وتفنّد التفسيرات التي رآها البعض إساءة ضمنية للفنانة لبلبة.
