الذكرى الخامسة لـ “القاضية ممكن” .. السولية يكشف كواليس فوز الأهلي بـ نهائي القرن
كشف عمرو السولية لاعب سيراميكا كليوباترا الحالي والأهلي السابق، كواليس تولي موسيماني القيادة الفنية للنادي الأهلي والفوز على نادي الزمالك في نهائي دوري أبطال أفريقيا نسخة 2020 والتتويج باللقب التاسع في تاريخ الأحمر.
وحقق الأهلي وقتها الفوز على الزمالك بهدفين مقابل هدف، ليحقق لقبه التاسع من الأميرة السمراء، والذي انتظره “المارد الأحمر” 7 سنوات.
وقال عمرو السولية عبر بودكاست شادي حبشي: “لم يتخيل أي لاعب في الأهلي أن يتولى موسيماني قيادة الفريق بعد رحيل فايلر، الأمر كان صدمة بالنسبة لنا، تعجبت من الأمر وكيف حدث ذلك”.
وتابع:” عندما وجدت بيتسو موسيماني داخل غرفة خلع الملابس، نظرت إليه كما لو كنت أقول له “أنت بقي اللي فضحتنا وعملت فينا كل ده، طب ماشي، وكنت عاوز أقوم أمسك في زمارة رقبته”.
وأكمل : “موسيماني قالنا في حديثه الأول، أنا مبسوط بوجودي في كيان كبير زي الأهلي، وأنا عارف كل لاعب موجود وإمكانياته وبيحب إية؟، وعارف اللاعبين بالاسماء والأرقام وأنا جاي علشان أكسب دوري أبطال إفريقيا وأنا حافظ القارة كلها، وهساعدكم علشان نكسب بطولة إفريقيا مع بعض، وعارف الفرق بتفكر وبتلعب إزاي؟، ودا اللي هنبدأ نشتغل عليه، وبعدها بدأ يحفظنا طريقة صن داونز في الملعب.
وواصل: “بدأنا نقتنع بموسيماني بعد الفوز على الوداد في نصف نهائي دوري أبطال إفريقيا، واللاعبون كانوا مبسوطين من طريقة اللعب”.
وتحدث السولية عن كواليس ما قبل نهائي القرن، قائلًا “لو كنا خسرنا من الزمالك النادي كان هيمشي نص الفريق، دخلنا معسكر قبل المباراة بحوالي إسبوع، وكنا وقت كورونا كل يوم بنعمل مسحة ومحدش عارف مين هيكون إيجابي أوسلبي ومش بنام علشان محدش عارف مين هيلعب المباراة؟، والكلام وقتها إن اللي هيكسب كان هيعيش على المباراة طول حياته”.
وتابع:” لاعبو الزمالك كانوا واثقين من نفسهم جدًا بعد مباراتي الرجاء، وكان واصلهم إحساس إنهم هيكسبوا الماتش، وطارق حامد قالي في معسكر المنتخب، الماتش الجاي هنكسبوا وهناخد إفريقيا، ومعلول كان بيحصل معاه نفس الأمر في منتخب تونس وتحديدا فرجاني ساسي”.
وواصل: “موسيماني كان مدربنا على الهدف الأول في نهائي القرن، واتدربنا على 7 أشكال مختلفة للعب الضربة الركنية وفي هدفي كل لاعب كان عارف هيتحرك إزاي بنفس شكل الهدف”.
وأوضح:” بعد الهدف تراجعنا في المباراة بسبب خوفنا من الخسارة، والفرصة التي أهدرها حسين الشحات كانت صعبة جدًا، لكن بعد هدف أفشة محدش كان مصدق إن الكرة دخلت المرمى، وكلمنا بعض إن الماتش هيخلص كدة حتى لو هنموت النهاردة في الملعب، وبعد المباراة كله بيجري في أي حتة أنا جريت خطوتين ووقعت على الأرض بعدها بعيط زي الأطفال”.
واختتم عمرو السولية تصريحاته: “البطولة فرقت معانا كلنا والشناوي بين الشوطين اتعصب علينا واللاعبين كانوا منهارين، وقالنا: لازم نكسب والشوط التاني لازم نرجع ونجيب جول لإن أهلنا بيتفرجوا على المباراة ولازم نرجع بالكأس وهو اللي فوق اللاعبين مرة تانية”.
