إبراهيم حسن يوجه رسالة لإمام عاشور: “راجع نفسك بسرعة.. جواك طفل وبيتم تسخينك”
وجه إبراهيم حسن، مدير منتخب مصر، رسالة مباشرة وحاسمة إلى إمام عاشور، لاعب النادي الأهلي، على خلفية أزمته الأخيرة، مطالباً إياه بالتركيز ومراجعة حساباته سريعاً، ومحذراً من أن استمرار هذا الوضع سيضر باللاعب والمنظومة الكروية المصرية بأكملها.
جاء ذلك خلال تصريحات أدلى بها لقناة “أون سبورت”، حيث كشف عن رؤيته لشخصية اللاعب وكواليس عودته للمنتخب.
“جواك طفل وبيتم تسخينك”
وصف إبراهيم حسن شخصية إمام عاشور قائلاً: “إمام جواه طفل، يعني هو طيب جداً. ممكن يكون فيه حد بيجي من فترة لفترة كده يحاول يديله معلومة غلط، أو يخليه -بلغة الكورة- ‘بيسخنه’ مثلاً إنه يقول عايز كذا أو يزعل”.
وأضاف: “يا ريت يبقى سامعني يا إمام. إحنا تعبنا كتير وإنت تعبت كتير جداً عشان توصل للفورمة دي. كل حاجة كويسة هتجيلك وإنت واقف على رجليك والناس كلها فرحانة بيك”.
تحذير من العودة للصفر
حذر مدير المنتخب اللاعب من مغبة الابتعاد عن مستواه الحالي، مشيراً إلى معاناته للعودة بعد الإصابة. وقال: “أول ما جيت معانا في التجمع كنت بتبدأ من تحت الصفر كمان، لأنك كنت جاي تعبان جداً. كل ما هتبعد بعد ما رجعت لفورمتك، هترجع تاني للصفر ودي حاجة مش كويسة”.
وأكد أن هذا التراجع سيضر بالجميع، قائلاً: “إنت الخسران، وفي نفس الوقت هتأذي المنظومة كلها لأنك من ضمن العناصر القوية في المنتخب. إحنا رايحين على مستوى كأس عالم، فلو ما كنتش جاهز هتعمل إيه؟”.
مطالبة بالاعتذار
طالب إبراهيم حسن اللاعب بضرورة احتواء الموقف من خلال الاعتذار، معتبراً أن ذلك هو الطريق لعودة الأمور إلى نصابها.
وقال: “مطلوب يبقى فيه اجتماع مع إمام في النادي الأهلي، ولو الغلط حصل منه يبقى فيه اعتذار لجماهيره وللنادي بتاعه، بحيث إن الناس كلها اللي زعلانة منه تسامحه”.
واختتم حديثه بأن الموقف الحالي “حساس جداً”، ولا يمكن التواصل مع اللاعب حالياً إلا بعد أن يحدد قراره مع ناديه.
