داليا سلام تكتب..
جبر الخواطر مش بس فعل طيب ده خلق عظيم ربنا بيحبه وذكره النبي ﷺ في معناه لما قال: “أحبّ الأعمال إلى الله سرور تدخله على مسلم” وجبر الخاطر هو بالضبط إنك تدخل السرور وتخفف الهم عن قلب إنسان.
أحيانًا كلمة بسيطة زي “ربنا معاك” أو “أنا جنبك” تكون أثمن من أي هدية لأن جبر الخواطر مش دايمًا فلوس أحيانًا يكون بابتسامة بسؤال صادق عن الحال أو حتى بسكوتك في وقت لازم فيه السكات.
الجميل في جبر الخواطر إنه مش بيحتاج مجهود كبير لكن أثره عميق… يمكن بكلمة منك تغير يوم شخص بالكامل أو تخليه يواجه الدنيا بقلب أقوى.
ولو فكرت هتلاقي إنك أنت كمان محتاج حد يجبر خاطرك فابدأ أنت وخلّيها عادة يمكن ربنا يسخر لك يوم حد يجبر بخاطرك وقت ضعفك.
في النهاية جبر الخواطر مش بس خلق إنساني ده عبادة بينك وبين ربك… عبادة تكتب في ميزان حسناتك من غير ما تركع ولا تسجد لكنها تعكس أن قلبك عامر بالرحمة.
فاجبروا خواطر بعض يمكن بكلمة منكم ربنا يجبر بخاطركم في الدنيا والآخرة.
