مش هى اللي غنت زمان انا هنا هنا يا ابن الحلال .. لا عايزة جاه ولا كتر مال .. احلم بعش أملاه انا سعد وهنا وانا هنا يا ابن الحلال .. وكمان غنت اغنية بديعة : مال الهوى يا مه مال الهوى .. انا لا ملت اليه .. ولا ندهت عليه .. هو اللي مال اللي مال يامه .. وغنت كمان ع البساطة البساطة ياعيني ع البساطة .. بدّى مستحلية اعيش .. جنبك يابو الدراويش .. تغديني جبنة وزيتون وتعشيني بطاطا.هى دي صباح ع الحقيقة زي ماشفتها وقعدت معاها واتغديت عندها .. انسانة بسيطة بدرجة تخليك مش مصدق نفسك .. بقى هى دي كريمة بنت الحسب والنسب في فيلم شارع الحب واللي داب فيها عبد الحليم دوب ؟ .. بقى هى دي القمراية اللي خلّت البرنس احمد مظهر يعرف يعني ايه يبقى راجل ويشتغل ويكسب لقمته من عرق جبينه في فيلم الايدي الناعمة ؟ .. بقى هى دي لمياء اللي عصمت كاظم وقع ومحدش سمّى عليه في فيلم الرجل التاني؟أيوه .. هى دي صباح .. النجمة بكل مقاييس النجومية .. لكن في بيتها .. واحدة عادية جدا .. وتلقائية جدا .. وتقول للبساطة قومي وانا اقعد مطرحك!
يوم ماقابلتها مكنتش صحفي معروف خالص .. وتوقعت وانا بكلمها في التليفون انها تعتذر او تتكلم من مناخيرها ، لكن لقيت فنانة جميلة وانسانة أجمل : اهلا بيك يا احمد .. تحب نتقابل بكره .. انا ساكنة في عمارة فريد الاطرش على النيل الدور السادس .. مستنياك ياحبيب قلبي!
الكلام ده كان سنة 79 تقريبا .. وصباح بعد نكسة 67 راحت لبنان ” بلدها ” وغابت عن الانظار سنين طويلة .. ولمّا رجعت بعد انتصار اكتوبر في 73 .. عملت حفلة في سينما ريفولي وغنت وهى بتبكي : والله واتجمعنا تاني ياقمر .. شوفوا بتوصف مشاعرها ناحية مصر ازاى : راجعة والشوق في العيون .. جاية للحضن الحنون .. امشي من تاني على ارض المحبة .. اللي قلبي طاير فوقها حبة حبة .. واللي دايما كان معاكو يا أحبة .. وانتوا جنبي ياحبايبي .. ألقى الفرحة مالية قلبي .. والاقي الدنيا ضحكة على وش القمر .. والله واتجمعنا تاني تاني ياقمر
أيه اللي خلّاكي تعيّطي في الاغنية دي ؟
جاوبت وعنيها مرغرغة بالدموع : عشان كانت مصر وحشاني اوي .. انا لبنانية صحيح ، بس مصر هى بلدي الحقيقية اللي كبّرتني وخلّتني نجمة وكل ناسها حبّوني .. ناس بالجمال ده كله .. يتشالوا فوق الراس واحفظهم في عيوني
أقولك حاجة
قول ياعيوني بس قبل ماتقول .. تشرب ايه الاول ؟ .. عندي كل حاجة على فكرة .. شاى قهوة سحلب .. اللي تؤمر به
شاى يامدام …. افتكرت انها حتنده ع الشغالة وتطلب منها تعمل شاى .. لقيت صباح قايمة بنفسها ع المطبخ وغابت كام دقيقة ورجعت شايلة صينية بسيطة اوي وعليها كوبيتين شاى…. حضرتك عملتيه بنفسك .. هى الشغالة اجازة النهارده؟
ردت : شغالة ايه وبتاع ايه .. انا هنا عايشة لوحدي .. وكل حاجة بعملها بنفسي .. ده بقى شاى بنعناع يجنن .. يخلي القعدة حلوة ويفتح النفس ع الكلام
سرحت مع نفسي دقيقة وشفت صباح في الايدي الناعمة وهى بتغني : امشي في السكة اشوف نفسي كده حلوة وروحي عجباني .. واتمنى اقابله ولو صدفة ويشوف تسريحتي وفستاني .. واكلم نفسي واقول يمكن شافني وعنيه مش عارفاني .. –
سرحت في ايه؟
فيكي يامدام .. في اغنية الدوامة .. فاكرة الايدي الناعمة؟
– طبعا فاكراه .. وكان معايا مريم فخر الدين وليلي فوزي
.لأ .. لأ .. ياملوعّلي قلبي دقة دقة .. يامضيّعي عمري خصام وفرقة .. يامبكيني ليل ونهار بحرقة .. قصدك انسى حبك .. برضه لأ لأ.
سألتها : عمرك قلتي ” لأ ” لحد يامدام صباح؟
انا طيوبة اوي على فكرة .. ومحبش أزعل حد .. بس فاكره المشكلة الأزلية اللي كانت بين عبد الحليم وفريد الاطرش ” الغيرة الفنية الطبيعية بين النجوم ” .. فطلبت من عبد الحليم ينهي الحدوتة دي ، فقال لي : خلاص .. هاتي فريد عندي في البيت ونتعشى سوا ويادار مادخلك شر.عبد الحليم كان لئيم و ” متعنطظ ” حبتين .. يعني زي مابتقولوا شايف نفسه .. فقلت له لأ ياحليم .. انتوا الاتنين لبّختوا في بعض بالجامد .. فلا هو يجيلك ولا انت تروح له .. انتوا الاتنين تيجوا عندي وتتعشوا معايا .. ووافق .. وفعلا صفّيت مابينهم واتصالحوا في بيتي قبل مايتصالحوا ع الهوى في برنامج تليفزيوني.
بس حضرتك حبّيتي التمثيل اكتر مع مين .. عبد الحليم في ” شارع الحب ” ,, ولا فريد في ” ازاى انساك “؟
– اقولك الحق .. عبد الحليم مش مريح في شغله .. دايما بتاع مشاكل .. فريد أهدى منه بكتير .. بس الفيلمين كانوا حلوين اوي .. لكن شارع الحب نجح اكتر عشان شعبية حليم كانت كاسحة.
هو صحيح فريد الاطرش لحن لك اغنية أكلك منين يابطة في خمس دقايق؟
– مش ممكن طبعا يعملها قي خمس دقايق .. بس انا طلبت من حسين السيد يكتب لي اغنية اغنيها لهويدا بنتي يكون دمها خفيف .. فكتب اكلك منين يابطة .. فاتصلت بفريد بالتليفون وسمّعته الكلمات .. وكتبها ورايا .. وقلت له خد وقتك بس عايزة لحن حلو يجنن.وبعد نص ساعة تقريبا لقيته بيتصل بيا ويسمّعهالي في التليفون .. فريد ملحن عبقري مشفتش زيّه.
شفتي فاتن حمامة في فيلم ” دعاء الكروان ” .. لو الدور ده اتعرض عليكي .. كان ممكن تعمليه؟” شوفوا بقى التواضع والجمال في ردها ” : – انت بتقول ايه ؟
انا أعمل ” أمنة ” أخت ” هنادي ” .. واذا حصل وعملته معقولة أوصل لروعة وجمال فاتن حمامة ؟ دي عبقرية يا احمد .. لا شفت ولا حاشوف زيّها في الأداء والتقمص.. وعلى فكرة انا مش نجمة سينما وماليش أدوار خطيرة .. افلامي كلها عادية وتمثيلي فيها عادي .. انما فاتن حمامة دي حكاية تانية .. كليّة متخصصة في التمثيل .. اللي عايز يتعلم يتفرج عليها.عشان كده بقولك انا مش نجمة سينما ، انما في الغنا أه .. ممكن تقول عليّا نجمة مؤثرة .. وعلى العموم انا بحب الغنا اكتر بكتير من التمثيل
ياه يا صبوحة .. بقالنا ساعتين بنتكلم وانا سعيد اوي اني قاعد معاكي .. مش عارف اشكرك ازاى.
– انت رايح فين .. الساعة 4 .. حتتغدى معايا!
منحرمش منك .. دايما عامر
.- سيبك من الاونطة دي .. حناكل سوا .. بتحب الملوخية ؟.
ملوخية ؟ وصباح اللي حتعملها كمان .. ازاى يعني ؟
– يابني انا ست بيت معتبرة ومعروف عني اني استاذة طبيخ .. واسأل عني عبد الحليم .. بيموت في الأكل بتاعي…. بس الملوخية دي حدوتة جامدة وأكلة مصرية 100 في 100 – طيب حدّوق وتحكم .
وحتعرفي تشهقي لها زيّنا؟
– طبعا ، واحسن منكم كمان .. اللي علمتني الشهقة دي مريم فخر الدين .. واتاري بجد بتفرق اوي في الطعم .. انتوا يامصريين عليكم حاجات تجنن ولذيذة.
وسابتني في الصالون وقمت ابص ع النيل من الفراندة .. وغابت كتير في المطبخ .. فخرجت وندهت عليها : انتي فين يامدام ؟
جاني صوتها الساحر : انا هنا هنا يا ابن الحلال .. ولقيتها بتقولي لي : تعالى ساعدني .. انت حتعمل فيها ضيف ولا إيه؟
ودخلت المطبخ معاها فقالت لي : انا عليّا الملوخية .. وانت عليك السلطة .. يالا ياحبيبي وريني شطارتك.فعلا عملت السلطة وهى بتعمل التقلية وتقلب الملوخية وقاعدة تغني وانا منسجم بدرجة لا تتخيلوها : أصحى بالليل من غير داعي على صوت من جوّه بيندهلي .. أفرك في عنيا واقوم خايفة الاقيني قصاد قلبي وعقلي .. العقل يقول سمّي ونامي والقلب شفايفه تودودلي!شفت حسين السيد وجمال كلماته .. وشفت عبقرية محمد الموجي .. مصر دي بلد العباقرة في كل المجالات.. بس الغريب انكم مش عارفين قيمتها وقيمة نفسكم!
واحنا بناكل وكانت الملوخية حلوة جدا .. قلت لها : تسلم ايدك بجد .. بس ايه اخبار السلطة ؟
– حلوة .
بس الملوخية أحلى … عشان اللي عملتها أحلى واحدة في الدنيا .. مكنتش اعرف ان روحك جميلة بالشكل ده.
– مظنش جه على بالك ولو للحظة قبل ما تيجني انك تاكل عندي ملوخية؟!.
وده اللي محيرني .. اكتب الموضوع ازاى ؟
.. ده انتي صحفية .. وصحفية خطيرة كمان .. عنوان عبقري فعلا.
وبخفة دم مشفتهاش قبل كده : إيدك بقى ع المعلوم!.
عيوني والله.
بأدب ورقة غير مسبوقة : يسلملولي عيونك الحلوين.
