أحمد عفيفي يكتب : خلصنا من الجزم اللي بره .. حنعمل ايه بقى في الشباشب اللي عندنا؟!!
كويس اوي اللي حصل .. اتصالحنا مع قطر وبقت قناة الجزيرة جميلة وزي الفل .. لا قلة أدب ولا مسخرة ولا صيد في المياه العكرة .. وادينا اتصالحنا مع تركيا .. عادي طبعا.. السياسة كده مفيهاش تقفيل دماغ ولا عنترية فارغة زي عنترية عبد الناصر زمان.. المصلحة تغلب .. واول مصلحة مباشرة كسبناها، إخراس الجزم القديمة في قنوات الشرق ومكملين.. مطر وزوبع وناصر اللي كانت شغلتهم اللي بيقبضوا عليها ملايين شتم السيسي والسخرية منه ومن كل مشاريعه.. يالا في ستين الف داهية تاخدهم وتاخد اللي خلفوهم .. صداع وكان واجع راسنا.. خلصنا منه والحمد لله.
طيب .. ادينا اترحمنا من الجزم اللي بره .. حتعملي ايه ياحكومة في ( الشباشب ) بتاعتنا .. انتي مش شايفة انها بقت قديمة اوي ومش مضبوطة على رجلك ، ومش حتعرفي تمشي بيها اى مشوار .. حتوقعك غصب عنك .. والمشوار ابو ساعتين حتروحيه في يومين.. وبعدين بقت قديمة اوي ومتربة ومطينة بطين.. ايه اللي عاجبك فيها ..؟ فيه حد يلبس شبشب ٢٥ سنة وميغيروش ، ولو حتى من باب التجديد .. ده انا عندي امشي حافي ولا الناس تعايرني بشبشبي المقطوع!!
انزلي الشارع ياحكومة ويانظام .. اسألوا الناس عن برامج التوك شو في جميع قنوات يامصر وشوفي حيقولوا عليها إيه.. اسأليهم عن احمد موسى وعمرو أديب ولميس الحديدي ونشأت الديهي وغيرهم، حتسمعي إجابة واحدة : زهقنا منهم ومن تطبيلهم.. وشوش بقالها ٢٠ سنة .. مبيقولوش غير اللي النظام عايزه يقولوه.. من ايام مبارك وهما كده ، عبيد القرش والحماية .. اوعي تصدقي ياحكومة انهم بيحبوا البلد زي مابيقولوا.. هما مش حابين غير نفسهم وحساباتهم في البنوك .. ولو السيسي ساب الحكم وجه غيره ولعن كما هى العادة في اللي قبله حتلاقي كل المذيعين مشيوا في ركابه، بقى الرئيس الجديد بابا وماما وانور وجدي
ده مش إعلام دولة بحجم مصر .. وصدقيني ياحكومة ، ضرره اكتر بكتير من نفعه على المدى الطويل .. بس انتي دايما بتبصي تحت رجليكي.. بصي لقدام شوية ، حتلاقي العمار في التغيير ( مش التطبيل ) .. انسفي حمامك القديم وسلكي المجاري بتاعتك .. هاتوا ناس تانية .. وشوش جديدة بتفهم .. ارحمونا من الجهلة والوشوش العكرة.. لميهم كلهم وشدي عليهم السيفون.. ولو معملتيش كده المجاري حتفضل طافحة ومحدش طايق ريحتها.. واللي بيشيل قربة مخرومة ، مابتخرش غير على دماغه.!
قطر وتركيا عملوا اللي عليهم .. رموا جزمهم المقطعة.. وباقي عليكي تقولي لنا حتعملي ايه مع الشباشب اللي عندك وعندنا .
