🔴 المقادير
لكيلو واحد دقيق..
2 كوب سمنة وبالجرام هتكون ٥٢٠ جم (ده للناس اللى بتحبوا ناعم اوى) اللى بيحبوا اخشن شوية هيبقى ٥٠٠ جم يعنى كوبايتين الا معلقة تقريباً
3 معالق كبار سمسم محمص
3 معالق كبار لبن بودر لو موجود
معلقة كبيرة خميرة
معلقة صغيرة مليانة بيكنج بودر
معلقة كبيرة سكر لتفاعل الخميرة
معلقة صغيرة بودر ريحة الكحك
معلقة كبيرة سكر بودرة تخلط مع الدقيق بيوحد لون الكحك من جوة وبرة ويبقى لونه محمص وجميل جدا
رشة ملح
⭕ ملحوظة …
الكحك لما بيتعجن بالميه بيكون أنعم وأخف من اللى بيتعجن باللبن وإحنا معوضين طعم اللبن باللبن البودرة فى المقادير
كمية الميه هتكون ١٥٠ مل للناعم و ١٧٠ مل للخشن.
🔶 الطريقة..
هضيف الخمير على ربع كوباية ميه دافية واضيف عليها معلقة السكر واقلبها كويس وتسببها تخمر على جنب
السمنة السايلة (السمنة تبقى دافية مائلة للسخن مش مقدوحة) علشان تكون خفيفة على المعدة وماتعملش حموضة.
يفضل السمنة البلدى الطبيعى لأنها ما بتعملش حموضة على عكس النباتى ، وممكن نعمل خليط تلت نباتى وتلتين بلدى علشان التكلفة.
هضيف باقى المكونات الجافة (البيكنج بودر واللبن البودرة وريحة الكحك والسكر البودرة) على الدقيق واخلطهم كويس
هنضيف السمنة على الدقيق ونبسها بإيدينا كويس فى الدقيق لغاية ما كله يتشرب ..(الكحك مش بيتعجن جامد) لازم كل الدقيق يتشرب السمنه كويس جداا ودى أهم خطوة علشان الكحك يطلع ناعم
وبعدها نضيف الخميرة بعد ما تكون خمرت وارتفعت فى الكوب ونبتدى العجن
هنستخدم فى العجن نص كوباية لبن حليب او ميه اللى متاح
وهنضيفهم شوية بشوية
بلاش نضيف سوائل كتير نص كوباية كفاية لأن السوائل لما بتزيد بتكون هى السبب الرئيسى فى نشفان الكحك
ممكن العجينة تبقى شكلها مفرولة لكن المهم انى لما اشكلها تتشكل معايا بسهولة بكده يبقى خلاص
بعد العجن هغطيها كويس فى مكان دافى واسيبها ترتاح لمدة ربع ساعة
بعدها ببتدى اشكلوا ولو فى حشو احشيه وتكون الحشوة مش كتير عشان ما يفتحش ويشقق فى السوى
🔶 الحشوات ..
العجوه تتقلب بمعلقه سمنه وشويه سمسم وتبقي فى قلب الكحكه مش ظاهره علشان ماتنشفش
والملبن يتنفض من النشا ويتعجن بمعلقه سمنه وسمسم وممكن مكسرات معاه ويتكور.
بعد كده ارص الكحك فى صاج بدون أى مادة دهنية افضل كفاية السمنة اللى فيه.
– بلااااش ورق زبدة … يمتص السمنه منه وبينشفوا
واحنا بنرصوا بلاش نبططوا اوى عشان لسه هيفرش فى السوى
نخليه عالى وقابب شوية لفوق عشان لما يستوى يكون شكله حلو
- بمجرد ما اشكله اسوية مباشرة عشان لو قعد فترة هيخمر تانى والنقشه بتاعته هتروح وريحة الخميرة هتبقى ظاهرة .
🔶 التسوية
نكون مشغلين الفرن قبلها بربع ساعة
الكحك السادة على ١٦٠ والمحشو على ١٨٠
ونحطوا فى الشبكة اللى فى النص
بياخد من 15 ل 20 دقيقة حسب حرارة كل فرن
🔶 الحفظ
فى حلل الومنيوم أو علب مغلفه ورق فويل من الداخل ويتقفل بكيس من بره ويتربط علشان يحافظ عليه من الرطوبه.
وخلاص كده كلوا أحلى كحك وعيدوا .
