بكلمات مؤثرة تخفي خلفها حزن شديد واشتياق كبير.. نعى شاب مصري زوجته الراحلة عبر صفحته على فيسبوك بعد وفاتها بعد أشهر قليلة من الزواج.
️قال الزوج في رسالته: “الحقيقة أنا مكنتش أعرف إنى حكتب كلام زى ده دلوقتى خالص و كنت مستنى إن أنتى اللى تكتبيهولى..
بس إرادة ربنا دائما بتضعني فى اختبار الرضا.. فإما الرضا و إما النار.. و طبعا أنا مش حِمل النار خالص فأنا راضى و هذا أول الحديث.
️وأضاف: “لما قعدت أفكر و أفتكر الأيام اللى فاتوا دول إكتشفت إن رحلتنا مع بعض على قد ما كانت قصيرة بس لقيتها مليانة حاجات حلوة أوى حاجات حلوة أوى يا هدير.. ضحكنا فيها كتير الحمد لله و كنا فيها خفاف على بعض”.
️واستطرد: “لما دخلت عشان أشوفك آخر مرة قالولى أقولك إنى أُشهد الله أني راضٍ عنك و مش عارف ساعتها حصل إيه بس الكلام طلع غصب عنى من خنقة صوتى و أتحشر صوتى بس قولت برضو”.
️وتابع: “دلوقتى أنا عايز أقولك إني مش بس راضي عنك.. أنا أُشهد الله أني ما رأيت فى حياتى زوجة مثلك تكرم زوجها كما أكرمتينى وأني والله ما رأيت منك إلا كل طيب جميل رقيق يسُر النفس و يسعد العين”.
️وأضاف: “أنا بقا اللى أتمنى إنك تكوني مشيتى و أنتى راضية عنى وإني أكون قدرت أسعدك فى الكام شهر اللى عيشناهم مع بعض”.
️واختتم رسالته قائلا: “عايز أقولك أني رجعت تاني بلا حائط صد يحجب عني قسوة الأيام.. أتمنى وإن كنت لا أُزكيك على الله إنك تكوني الآن منعمة فى قبرك تُبصرين مقعدك في الجنة.
