علق إمام عاشور لاعب خط وسط الأهلي على أزمته الأخيرة مع الأخيرة بعد التخلف عن السفر مع بعثة الفريق المتجهة إلى تنزانيا لخوض مواجهة يانج أفريكانز.
وأعلن النادي الأهلي في بيان رسمي تغريم اللاعب مليونا ونصف المليون جنيه، وإيقافه لمدة أسبوعين والتدريب منفردا، على خلفية تخلفه عن السفر إلى تنزانيا.
وقال إمام عاشور عبر حسابه الرسمي على إنستجرام: للأسف كلام كتير مغلوط وغير صحيح بيتردد بخصوص اللي حصل، وأنا متقبل أي قرار ياخده النادي، وواثق أنه المسئولين في الأهلي هيتفهموا موقفي كويس.
وواصل إمام عبر حسابه: أنا فعلا عندي دور برد جامد ودرجة حرارتي عالية وتقلبات في المعدة بشكل غير طبيعي. وباخد مضادات حيوية. وللأسف كل أسرتي بتعاني من نفس الأعراض.
وأكمل: وأنا بلغت الدكتور أحمد جاب الله بظروفي الصحية وعدم قدرتي على السفر، وده إجراء غير كافي في مثل هذه الأمور، لكن أخطأت بحسن نية وكان المفروض أتواصل مع الكابتن وليد صلاح الدين علشان يبلغ المدير الفني وتتعمل الإجراءات الطبية المتبعة عند التخلف عن السفر، الموضوع اتقفل خلاص.
وزاد: تواصلت امبارح بالليل مع الكابتن وليد صلاح الدين، وأنا تحت أمر النادي، وجمهور الأهلي سندي وضهري بعد ربنا سبحانه وتعالى، وبعتذر للنادي والجهاز الفني وزمايلي وقبلهم جمهور الأهلي، أنا فخور باللعب في أكبر نادي في أفريقيا، وعلاقتي بجماهيره العظيمة لا تقبل القسمة على اتنين، وأرجو من الجميع إغلاق هذا الموضوع.
وأوضح: والناس اللي بتقول ان إمام عايز يلوي دراع النادي بقولهم حسبي الله ونعم الوكيل، محدش يقدر يلوي دراع الأهلي، ولا يمكن أفكر بالطريقة دي أبدا، وانا اتشرفت بارتداء الفانلة الحمراء وبقالي 3 سنين في النادي، والحمد لله عمري ما قصرت لا في حق النادي ولا جماهيره، وده حقهم عليا.
وأتم إمام عاشور: وجودي في الأهلي نادي القرن وفي ضهري جمهور الأهلي يعوضني عن كل حاجة، عندنا ماتش بكره مهم، يارب كل التوفيق الزمايلي والجهاز الفني ونحقق الفوز اللي يسعد كل الأهلاوية.
