انا مشفتش الفيلم لحد دلوقتي ، بس مش عاجبني اللي عمله وقاله شريف منير ( الفيلم كئيب ويسئ لسمعة مصر ) عشان كده مقدرتش أكمله وخرجت بعد ١٠ دقايق.
رزق وأشرف عبد الباقي قالوا بس انه كئيب وسحبوا كلمة إساءة لسمعة مصر .. والتلاتة غلطانين.. فأنت كفنان مفترض عشان تحكم على عمل فني، تشوفه للأخر .. منتش بياع فول ولا فجل عشان تزهق وتخرج.. انا مثلا زمان دخلت فيلم المومياء للعبقري إخراجا شادي عبد السلام.. وكملت الفيلم بالعافية، بس كملته عشان اعرف اكتب عنه .. لكن عمري ماشفت فيلم وخرجت منه لأنه بيسئ لسمعة مصر.. والا بقى كنا حاكمنا نجيب محفوظ وحسين كمال المخرج عشان فيلم ثرثرة فوق النيل.. وسجنا يوسف إدريس عشان فيلم الحرام ونفينا ثروت اباظة لأنه كتب شئ من الخوف.. والافلام التلاتة تحديدا من وجهة نظر الهلافيت إساءة بالغة لسمعة مصر .. بس الفن عمره ماكان للتطبيل والتهييص.. الفن مهمته الأساسية انتقاد الاوضاع وكشفها وفضحها.. حتقولي بس مصر دلوقتي حاجة تانية والمشاريع فل الفل ، حاقولك ماشي وعلى راسي .. يعني الحكومة مثلا بتحارب الفسدة وتسجنهم .. فهل معنى كده ان البلد نضفت من الفساد؟ .. لأ طبعا .. فأنا لما اكتب عن تفشي الفاسدين وسطوتهم لحد دلوقتي ، تعلق لي المشنقة.؟
الحكومة مثلا بذلت مجهود كبير للقضاء على العشوائيات، فهل خلا المجتمع من الفقر والأسر المعدمة كما هو واضح في فيلم ( ريش ).. لأ طبعا .. لسه فيه ناس بتشرب من ميه المجاري وبتاكل من صناديق الزبالة، فلو جيت واتكلمت عن الناس دي ابقى كفرت وبسئ لسمعة مصر؟ .. وهى مصر دلوقتي مفيهاش غلطة واحدة ممكن انا ككاتب او مخرج اتكلم عنها او اتناولها في عمل فني؟ .. ده كده نقفل على السينما بالضبة والمفتاح ونخلي كل المخرجين يشتغلوا مذيعين توك شو زي عمرو أديب وموسى وبكري والديهي ، ويالا نعمل حفلة نتغنى فيها بمصر الخالية تماما من اى مشاكل والانضف من الصيني بعد غسيله!
………….
اللي بيسئ لسمعة مصر انك تعمل فيها وطني بالاونطة وتكسب بنط .. اللي يسئ لسمعة مصر اني أخاف اقول اللي انا شايف انه غلط ، فيجروني من قفايا واتسجن.
المفترض اننا في بلد ديمقراطي، حرية الرأى مكفولة للجميع، حتى لو كان رأيي ده غلط ولو كنت حتى أعمى مش شايف ، بس سيبني أفك عن نفسي وافضفض.. مش كلامي اللي بيسئ لسمعة البلد ، ولكن الدفاع المستميت عن إنجازاتها وأن مفيش احسن من كده واحنا كنا فين وبقينا فين، هو ده الغلط الحقيقي.. هو ده الجهل بعينه.. الاتجاه الواحد والصوت الواحد عمره – عبر التاريخ- ماعمل دولة.. بس احنا عاجبنا كده .. لو مش شايف البلد بتعمل ايه ، حنخزأ لك عينيك.. ولو مبسوط من فيلم ( ريش ) تبقى مشربتش من نيلها ولا جربت تغنيلها!
………….
والله شربت من نيلها وارتويت .. بس مش بعرف أغني زيكم .. وبحب مصر اكتر منكم كلكم وحافضل انتقدها على اى شئ ناقص فيها.. وحافضل شايلها في عنيا، لأني ماليش بلد تانية غيرها.
خلص الكلام .. يالا سلام.
اقرأ ايضا :
