أحمد عفيفي يكتب : الست ( أبو شنب )!!

كل واحد او واحدة نفسها تبقى إعلامية.. سهلة اوي .. اقعدي والتليفون قدامك والكاميرا شغالة وهرتلي في اى كلام واشحتي اللايك والشير، يمكن تطلعي بقرشين يمشوا الحال لأخر الشهر.
………..
منى ابو شنب .. بشوفها بالصدفة على الفيس وعمر كلامها ماشدني.. عرفت انها خريجة اقتصاد منزلي .. يعني ينفع تطلع تطبخ وتعرفنا طريقة عمل المحاشي والباشميل.. انما إعلامية تناقش أمور ثقافية او أدبية أو حتى تعلق على أمر ديني .. مينفعش.
………..
الست ابو شنب عاملة دوشة كبيرة وفرحانة اوي بالدوشة دي .. متخيلة انها اتشهرت وممكن اى قناة تطلبها وتتعاقد معاها.. هى اساسا صعبان عليها اوي الولد الطالب اللي قتل نيرة طالبة المنصورة .. ودافعت باستماتة عن مبروك عطيه لما أمر البنات يلبسوا ( قفف ) عشان مايندبحوش في الشارع.. المهم الست دي اتهمت أهل القتيلة انهم طالبين تعويض مليون جنيه .. وان فيه حملة هى بتشجعها لزيادة الدية ل ٥ مليون جنيه .. بس الولد ميتعدمش.. ودفاعا بقى عن القاتل ، راحت تلمح بشكل تتحاسب عليه لأمور سخيفة عيب تتقال .. بس في الأخر هى عايزة تقول ان كانت نيرة ضحية .. فالقاتل برضه ضحية عشان كذا وكذا وكذا.
………..
اهل نيرة مسكوا ابو شنب وهاتك ياشتيمة ودعا عليها انها تشوف اللي شافوه وتبتلى في أعز ماتملك ان كان ليها بنات .. وانكروا تماما انهم طلبوا اى نوع من الدية مؤكدين: ولا ملايين الدنيا تعوض ضفر من ضفر اللي اندبحت.
………….
طبعا ابو شنب حققت الغرض بتاعها وعدد متابعينها زادوا .. والمفروض انها تشكر أهل نيرة لأنهم بسذاجة افتكروا انها إعلامية بجد ، وهى لا إعلامية ولا نيلة .. زيها زي مئات الباحثين عن الشهرة والفلوس على حساب اى حاجة ، ولو كانت الحاجة دي محاولة تلويث سمعت بنت ماتت متقدرش تدافع عن نفسها.!
………..
ياست ( ابو شنب ) يابتاعت الاقتصاد المنزلي .. فكري لنا في أكلة تفتح النفس في الحر ده .. البسي مريلة المطبخ واعملي حاجة تنفع ستات البيوت .. حتكسبي اكتر ويمكن ام بي سي تشيل الشيف حسن وتجيبك.
غير كده لأ .. متنفعيش تكوني إعلامية.. حاجاملك واضحك عليكي؟ ابقي معنديش ضمير.. روحي دلوقتي، شوفي عيالك حتاكل ايه .. أفيد ليكي وليهم ، وبالتأكيد لينا كلنا!