عضو مجلس إدارة الأهلي يوجه رسالة نارية لجمهور الأحمر بسبب الحضور الجماهيري
تحدث محمد الدماطي عضو مجلس إدارة النادي الأهلي عن ضعف عدد الحضور الجماهيري خلال مباريات الفريق الأحمر ضمن منافسات مسابقة الدوري الممتاز للموسم الحالي.
ويرتبط الفريق الأحمر بخوض مواجهة صعبة مساء غدًا السبت أمام زد ضمن منافسات الجولة الـ 20 من منافسات الدوري المصري الممتاز.
وكتب الدماطي عبر حسابه الرسمي على فيس بوك: “حتكلم في البوست ده بصفتي مشجع أهلاوي قبل ما أبقي عضو مجلس إدارة، وعارف حجم الأبواب اللي حتتفتح عليا، بس أنا مش بعرف استخبي مهما كان درجة عدم رضاك عن الإدارة أو الفريق أو أي شيء “.
وأضاف “ده مش مبرر أبدا لضعف الحضور الجماهيري في مباريات حاسمة في الدوري، لو هي ظاهرة عامة ممكن أقول فقدان شغف، أو مشاكل مع الجمهور، لكن لما يبقي الحضور كامل العدد في ماتشات أفريقيا وعدد قليل جدا في مباريات الدوري يبقي إيه السبب، هل بنوصل رسالة للاعبين إن الدوري مش مهم، مفيش أي مبرر منطقي للتفاوت دة، ومش حندفن راسنا في الرمل ونعمل مش واخدين بالنا، كل البطولات مهمة، والتواجد الجماهيري ده لوحدة بيحسن الأداء، أنا علي مدار عمري كنت اكتر فترة لازم ابقي موجود فيها في المدرج والفريق محتاجني عشان يكسب”.
واختتم الدماطي في رسالته لجماهير الأهلي: “نقفل علي نفسنا شهرين بس، نركز مع حاجة واحدة اننا نزق فرقتنا لقدام لحد آخر الموسم، نشجع ونروح الاستاد، ونسيب اي انتقادات علي جنب دلوقتي عشان مش مهم الأشخاص، محدش حيفتكر حاجة غير البطولات في الآخر، المهم الأهلي، الأهلي وبس، ياريت الناس المؤثرة تتبني الاتجاه ده، كل حاجة لسه في ايدينا، وان شاء الله ربنا حيكرمنا في الآخر”.
