علق عبد الواحد السيد، مدير الكرة السابق بنادي الزمالك ، على الحكم لصالح عمر فرج لاعب الفريق السابق بأحقيته في الحصول على مليون و700 الف دولار،وإيقاف قيد الفارس الأبيض.
وقال السيد، خلال تصريحات تليفزيونية عبر برنامج” اللعيب في كأس العالم” على قناة “ام بي سي مصر” مبدئياً بس اللي ماسك ملف التعاقدات في الزمالك لازم يتحاسب، إنت جالك إيقاف قيد تأديبي، ده كارثة حقيقي بعيدا عن قصة الفلوس”.
و أضاف:” السبب إن اللاعب اتمرن منفرد وده غلط، وأنا معرفشي مين صاحب القرار ده، مين المسؤول اللي منزلوش التدريب؟ مينفعش تمنعه، ودي كارثة ولازم يبقى في تحقيق”.
وشدد عبد الواحد:” المشكلة في الزمالك قبل اي حاجه مفيش تواصل مع اللعيبة، لما يبقى في أحكام يبقى الناس نايمة حرفياً”.
وواصل:” مين ماسك الملف؟ لازم يتحاسب يا جماعة دي أرقام كبيرة، اللاعب على فكره كان بياخد فلوسه بالمصري، وانا كنت موجود وشاهد على كده فكان سهل تدفعله، معرفش عقده مكتوب فيه ياخد أجنبي ولا لأ، لكن وقت وجودي كان بيقبض فلوسه مصري”.
و أشار عبد الواحد:” معرفش تفاصيل العقد، هو كان ماضي 5 سنين، الطبيعي لاعب مش عايزه أقعد معاه وأوصل لحل، ولو موصلتش لحل ياخد جزء من فلوسه بأي طريقه متسبش الأمور توصل لكده”.
وزاد: “إنت بتتجاهل اللاعب لحد ما ياخد حكم، ليه؟ ليه مبتتواصلش مع اللعيبة ولا بتوصل لتسوية؟ فبياخدوا أرقام كبيرة”.
وأتم:” وكيل مصدق لما اتكلم قال محدش تواصل، زي مشكلة خالد بوطيب، كانت مشكلة تواصل، عندنا مشكلة كبيرة في الحتة دي”.
