بقلم الكاتب الصحفي – أحمد عفيفي
الدنيا مقلوبة على إبراهيم عيسى بشكل غير مسبوق بسبب حلقة كاملة خصصها للكلام عن تاريخ الرياضة في مصر من ايام الملك فاروق.. وكان لازم طبعا يجيب سيرة الأهلي وتاريخه وسطوته على كل الفرق التانية ، مش عشان لعبه حلو ، ولكن عشان دايما ضهره مسنود .. أيوه ضهره مسنود من فوق .. ومن فوق دي اقصد بيها الحكومة والسلطة كلها.. مش محبة للفانلة الحمرا .. ولكن خوفا من جماهيره العريضة.. ( خليهم مبسوطين وغفلانين عن السياسة وملهيين في انتصاراتهم ونجومهم ) .
الزمالك مفيش منه خوف .. جمهور مش غاوي مشاكل .. بيشيل في نفسه ويحبس.. بس عمره ما حيعمل دوشة عشان دوري راح ولا كاس طار منه ( بفعل فاعل ).
………….
صحيح شعار الأهلي فوق الجميع كان مقصود به ايام صالح سليم انه فوق جميع أبنائه .. لكن من يومها والأهلاوية قلبوه وبقى المقصود به فوق جميع الأندية، صغيرها وكبيرها.
شعارهم المعلن والمستتر : إحنا الأهلي.. انتوا مين ؟!!
هو ده اللي كان يقصده ابراهيم عيسى.. ودي حقيقة .. ضياء السيد مثلا لاعب الأهلي السابق قالها بالمفتشر.. الشعار مقصود به فوق جميع أعضائه .. لكن لو حنتكلم بالأرقام يبقى ايوه فوق جميع الأندية واخبط راسك في الحيط.
ابن اختي واسمه وائل أهلاوي مستفز جدا .. اتكلم مرة مع زملكاوية من العيلة بالطريقة دي .. بتقوله دي مش كورة .. لو ع اللعب وفنون اللعب ، بينا وبينكم مسافات كبيرة لايمكن تقدروا تجارونا فيها .. لكن بالطرق التانية اللي انت عارفها بتجيبوا البطولات وتاخدوها بالذوق بالعافية .. تاخدوها.. الوزير يشيل إدارة الزمالك ولا حد يفتح بقه .. لكن طاهر ابو زيد لما كان وزير ( وأوعى تنسى انه كان لاعب كبير في الأهلي ) لما أصدر قرار بحل مجلس الأهلي ، هو اللي اتشال وقعد في البيت.
فكان رد ابن اختي: طبعا وكويس انه متسجنش.
بتسأله : ليه إن شاء الله؟.. فرد عليها : عشان احنا الأهلي .. انتوا بقى مين؟
مش عايزة اقولك عملت فيه إيه.. بالحقائق مش بالكلام .. ومن يومها يشوفها قاعدة يروح يقعد في حتة تانية !!
………….
ابراهيم عيسى مغلطش بحيث يثير غضب الأهلاوية والإعلام الأهلاوي للدرجة دي .. ده جايب لكم تاريخ مدون ومكتوب من ايام الملكية .. وبينصح الأهلاوية كلهم بلاش الشعار ده لأنه شعار نازي مش حلو .. وبيقولك : إن كنت ( نازي.. أفكرك ) زي غنوة هدى سلطان ان كنت ناسي أفكرك .. وانتوا دايما بتنسوا لأنكم عارفين الحقيقة ، بس مش جاية على هواكم .. كدبة وصدقتوها وانتوا بينكم وبين بعض عارفين ان مستوى الأهلي على مدار تاريخه الطويل ميخدش به ٤٠ دوري و١٠ افريقيا و ٥٠ كاس.. وكأن مفيش غيره اللي بيلعب كورة في مصر.
ولأ .. والأكادة يقولك احنا مظلومين .. كل البطولات دي ومظلومين .. ياعم اظلمني وطلع عين أمي واديني نصها.
………….
حاقولكم على واقعة واحدة عاصرتها.. كان الأهلي بيلاعب المقاولون العرب في ستاد القاهرة ، والأهلي كان بس محتاج يتعادل و ياخد الدوري.. واللي حكا لي الحكاية دي لاعب في المقاولين كان اسمه ناصر محمد علي .. كان حريف اوي ومات الله يرحمه.. الأهلي مكتفي بالنقطة .. واحنا عارفين مفيش تسلل وانت في نص ملعبك يعني قبل خط السنتر .. فجات كورة لناصر ومفيش مدافع اهلاوي مغطيه.. جري بيها ناصر وجاب جون في ثابت البطل.. راح الحكم مصفر وقالك اوفسايد.. ازاى ياكابتن .. طيب مصفرتش ليه وانا قاطع مشوار نص كيلو لحد ما جبت الجون .. ( ده ناصر محمد علي اللي بيسأله ) .. وكان رده العجيب الغريب – والعهدة هنا على لاعب المقاولين اللي اقسم لي بالله ان ده حصل – ان الحكم قاله .. لو حسبتها حاتقدر تحميني من ال ١٢٠ الف اللي في الاستاد؟!
لو عايزين وقائع تانية اكتب لكم فيها مؤلفات.. بس مفيش داعي .. انتوا عندكم قناعة تامة بأنكم فعلا فوق الجميع وان الدولة نفسها متقدرش عليكم لأنكم الأهلي .. فليه زعلانين كده من ابراهيم عيسى.. هو قالكم الحقيقة اللي انتوا عارفينها وفرحانين بيها.. والإعلام الأهلاوي من ساعتها حيتجنن.. واللي يقولك الأهلي شطب عضوية ابراهيم عيسى.. واللي يقولك قدموا فيه بلاغ للنائب العام.. واللي يقولك كيت وكيت وبهدلتوا الراجل عشان قال كلمة حق .. وضياع الدوري منكم السنة دي عامل لكم صدمة عجيبة .. تقولشي اللي أخده منكم فريق كفر البطيخ ؟ .. ده الزمالك يا ناس .. بمزاجكم او مش بمزاجكم فريق كبير .. وكبير اوي كمان .. واللي مش شايف كده يبقى صغير وصغير أوي كمان.
